40 ta turizm korxonasi faoliyati to'xtatiladi 🕋

O'zbekistonda jinoiy ish ochilgan 40 ta turizm korxonasining faoliyati vaqtincha to'xtatilishi rejalashtirilmoqda. Bu haqda mamlakatimizning Turizm qo'mitasi matbuot xizmati rasman ma'lum qildi.

Ushbu choralar Transport prokuraturasi tomonidan umra xizmatlarini tashkil etish bilan shug'ullanuvchi 40 ta sayyohlik agentligi va turoperatorga nisbatan boshlangan dastlabki tergov ishlari doirasida ko'rilmoqda. Transport prokuraturasi tegishli litsenziyalarni to'xtatib turish yuzasidan Turizm qo'mitasiga maxsus xat yuborgan.

Qo'mita ta'kidlashicha, mazkur xat Saudiya Arabistonidan O'zbekistonga qaytish reyslari kechikib ketgani oqibatida moddiy hamda ma'naviy zarar ko'rgan fuqarolarning murojaatlari asosida yo'llangan. Murojaatlarda tilga olingan sayyohlik subyektlari bo'yicha ma'lumotlarga aniqlik kiritish maqsadida Turizm qo'mitasi o'z mutaxassisini Transport prokuraturasiga yuborgan.

Hozirgi vaqtda Turizm qo'mitasi mamlakat Transport prokuraturasi bilan hamkorlikda ushbu ishlarga aloqador korxonalarning soliq to'lovchi identifikatsiya raqamlarini aniqlash ustida ish olib bormoqda. Mazkur STIR raqamlari to'liq aniqlangach, jinoiy ish qo'zg'atilgan mazkur sayyohlik kompaniyalarining faoliyati vaqtincha to'xtatib turiladi.