🇮🇹 Lineapelle ko'rgazmasida O'zbekiston

Milan Moda haftaligi doirasida charm, aksessuarlar, butlovchi qismlar va matolarning navbatdagi Lineapelle xalqaro ko'rgazmasi o'z ishini boshladi. Ushbu nufuzli anjuman moda va charm sanoati olamining 26 mingdan ortiq tashrif buyuruvchilarini birlashtirdi. Ularning orasida dunyoning 114 dan ortiq davlatidan kelgan 10 mingdan ziyod xorijiy kompaniyalar vakillari, xaridorlar va chakana savdo sohasi mutaxassislari bor.

"O'zcharmsanoat" uyushmasiga a'zo bo'lgan mahalliy teri korxonalari ushbu xalqaro maydonda 48 kvadrat metr maydonni egallagan jamoaviy stend orqali o'z mahsulotlarini namoyish etmoqda. Ko'rgazmaning dastlabki kuniyoq qator muhim uchrashuvlar va muzokaralar tashkil etildi. Xususan, Italiya-O'zbekiston savdo uyi vakillari bilan o'tkazilgan muloqotda o'zbekistonlik ishlab chiqaruvchilarning teri va poyabzal mahsulotlarini Italiya bozorida sotish masalalari muhokama markazida bo'ldi.

Shu bilan birga, Italiyaning "Tecon" kompaniyasi ham O'zbekiston korxonalarining ishlab chiqarish jarayonlarini texnologik jihatdan yangilash bilan bir qatorda tayyor mahsulotlarni xarid qilishga qiziqish bildirdi. Tomonlar o'rtasidagi kelgusi hamkorlikning istiqbolli yo'nalishlari Toshkent shahrida bo'lib o'tadigan 13-xalqaro UzCharmExpo-2022 ko'rgazmasida batafsil ko'rib chiqilishi va tegishli shartnomalar tuzilishi kutilmoqda.

Xalqaro miqyosdagi mazkur tadbir doirasida o'zbekistonlik korxona vakillari xorijiy hamkorlar bilan jami 15 ta investitsiya hamda eksport shartnomalarini imzolashni rejalashtirgan.