TV seriallar real siyosatni qanday oldindan aytgan? 📺

Oskar Uayld oʻzining 1989-yilgi inshosida hayot sanʼatga taqlid qilishini taʼkidlagan edi. Bugungi kunda esa siyosat va ommaviy madaniyat oʻrtasidagi chiziqlar tobora yuvilib ketayotgani bois, bu ibora real hayot va ekrandagi siyosiy dramalar kesishmasida yaqqol namoyon boʻlmoqda. Televizion seriallar qanday qilib kelajakdagi real siyosiy voqealarni oldindan bashorat qilgani koʻplab qiziqishlarga sabab boʻlmoqda.

Birmingem universiteti tarixchisining taʼkidlashicha, 1980-yillarda namoyish etilgan BBCning "Allo 'Allo" komediyasi Britaniyaning Yevropa Ittifoqidan chiqishi bilan yakunlangan 2016-yilgi referendumga zamin tayyorlagan siyosiy madaniyatni qisman yoritib bergan. Fransiyadagi kafelardan biri atrofida kechuvchi bu shou Britaniya va uning yevropalik qoʻshnilari orasidagi asosiy farqlarni ochib bergani aytiladi. Mutaxassisning fikricha, serial ortida oʻz qoʻshnilari bilan chiqisholmaydigan millat obrazi yashiringan.

Netflix platformasidagi "The Politician" serialining ikkinchi faslida Gvinet Peltrou ijro etgan qahramon Kaliforniya gubernatorligiga saylanish kampaniyasida shtatning AQShdan ajralib chiqishini vaʼda qiladi va ovozlarning 98 foizini qoʻlga kiritadi. Real hayotda ham bu gʻoya vaqt oʻtishi bilan qoʻllab-quvvatlanib, "Califrexit" harakati kuchaygan va soʻrovlarga koʻra aholining aksariyati shtat mustaqil boʻlsa yaxshiroq yashashiga ishongan.

BBCning "The Thick of It" komediyasi esa real voqealarni shunchalik koʻp oldindan aytganki, shou ijodkori siyosatchilar ulardan ilhom olayotganini taxmin qilgan. 2012-yilda siyosatchi Ed Miliband hukumat byudjetini tanqid qilish jarayonida serialdagi "omnishambles" soʻzini ommalashtirgan edi. Serial qahramoni Malkolm Taker tomonidan ishlatilgan bu soʻz notoʻgʻri boshqarilgan vaziyatni anglatib, 2013-yilda Oksford lugʻatiga ham kiritilgan.