Mika Hakkinen: F1 texnologik jihatdan juda murakkablashdi 🏎

Formula 1 chempionatining sobiq yulduzi Mika Hakkinen soʻnggi yillarda mazkur nufuzli poyga seriyasi texnologik jihatdan juda murakkablashib ketganini taʼkidladi. Uning fikricha, kundalik hayotimiz oʻzi yetarlicha murakkab boʻlgani sababli, muxlislarni oddiy va tushunarli narsalar koʻproq oʻziga jalb qiladi. Shu boisdan muxlislar shunchaki tomoshabin boʻlib qolmasdan, jarayonda bevosita qatnashishni istashlarini aytgan Hakkinen, buning uchun ijtimoiy tarmoqlar orqali muloqotni kuchaytirish muhimligini qoʻshimcha qildi.

Mavsum yakunlari va kelgusi musobaqalar haqida gapirar ekan, Hakkinen Niko Rozbergning imkoniyatlariga yuqori baho berdi. Oʻtgan mavsum davomida Niko oʻz jamoadoshiga qarshilik koʻrsata olmagan boʻlsa-da, chempionlik masalasi muddatidan oldin hal qilinganidan keyin ketma-ket uchta Gran-pri gʻalabasini qoʻlga kiritgandi. Garchi bu gʻalabalarning aniq sababi nomaʼlum qolayotgan boʻlsa-da, sobiq poygachi nemis sportchisi kelgusi mavsumda yana chempionlik uchun jiddiy kurash olib borishiga ishonch bildirmoqda.

Hakkinen Lyuis Hemilton muddatidan avval chempion boʻlganidan soʻng oxirgi poygalarda biroz boʻshashgan boʻlishi mumkinligini taxmin qildi. Shu bilan birga, mavsum oxiridagi magʻlubiyatlar ruhiy holatga salbiy taʼsir koʻrsatishi va bu omil kelgusi chempionatda ham oʻz taʼsirini koʻrsatishi mumkinligini taʼkidladi. Sobiq chempion Niko ogʻir vaziyatga tushib qolganini tan olgan holda, ikkinchi oʻrin bilan kelishib qolmasdan, oxirigacha kurashishda davom etishi zarurligini uqtirdi.