Arsenal yozgi transferlarda faol bo'ladi 💰

Londonning "Arsenal" klubi yaqinlashib kelayotgan yozgi transfer oynasida eng faol ishtirokchilardan biri bo'lishga hozirlik ko'rmoqda. Jamoaning so'nggi moliyaviy ko'rsatkichlari kelgusida transfer bozorida raqobatbardosh bo'lish uchun yetarli zaxiraga ega ekanini ko'rsatmoqda.

Klub 2024-25 yilgi mavsum davomida tarkibni kuchaytirish uchun o'rtacha darajada, taxminan 88 million funt sterling investitsiya kiritgan edi. Natijada ushbu moliyaviy yilda klub atigi 1,4 million funt zarar ko'rdi, umumiy daromad esa rekord darajadagi 691 million funtga yetdi. Shundan so'ng, 2025-26 yilgi mavsum oldidan yettita futbolchi uchun qo'shimcha to'lovlarni hisobga olmaganda 250 million funt mablag' sarflandi.

Futbol moliya tahlilchisi Kieran Maguayurning fikricha, jamoa tarkibni yanada kuchaytirish uchun mustahkam poydevorga ega. "Arsenal" UEFAning moliyaviy feyr-pley qoidalari hamda Premyer-liga talablarini bajarishda hech qanday muammoga duch kelmaydi. Bunga klub maoshlar fondining umumiy daromadga nisbatan taxminan 50 foizni tashkil etishi sabab bo'lib, bu borada ular ligada ikkinchi o'rinda turadi.

Klubning rekord darajadagi 691 million funtlik daromadi asosan tijorat sektori hisobiga shakllandi. Xususan, chakana savdo operatsiyalarining 27 foizga o'sishi tijorat daromadini 218,3 million funtdan 263,2 million funtga yetkazdi. Shuningdek, kelgusi yillarda chiptalar narxining ketma-ket beshinchi mavsum davomida o'rtacha 3.9 foizga oshirilishi matchday daromadlarini yanada oshirishi kutilmoqda.

Biroq, bu narx siyosati va yangi premium toifadagi chiptalarning joriy etilishi muxlislar orasida noroziliklarga sabab bo'ldi. Shunga qaramay, moliyaviy tahlilchilar ushbu strategiya klubni tijorat jihatidan butunlay yangi bosqichga olib chiqqanini e'tirof etishmoqda. Shu bilan birga, boshqa bir London klubi "Chelsi" 2024-25 yilgi mavsumda 342 million funt miqdorida soliqdan oldingi rekord darajadagi zarar ko'rgani ma'lum qilindi.