MMA Ittifoqi: 14-sentabrda taqdir hal bo'ladi 🥊

Rossiya Sport vazirligi mamlakat MMA ittifoqining vaqtincha to'xtatib qo'yilgan akreditatsiyasini tiklash masalasini ko'rib chiqishga tayyorlanmoqda. Ushbu muhim yig'ilish 14-sentabr kuniga belgilangan bo'lib, unda tashkilot taqdiri hal qilinadi.

Mazkur jarayon joriy yilning iyun oyida Amur viloyatidagi musobaqalar davrida kelib chiqqan fojiali voqea ortidan yuzaga kelgan edi. O'shanda sport vazirligi tashkilotning akreditatsiyasini uch oylik muddatga to'xtatish haqida qaror qabul qilganligi ma'lum qilingan edi.

TACC agentligining tashkilot bayonotiga tayanib xabar berishicha, o'tgan oylar mobaynida Rossiya MMA ittifoqi xavfsizlik choralarini kuchaytirish bo'yicha salmoqli ishlarni amalga oshirgan. Xususan, aralash jang san'ati qoidalariga mos ravishda musobaqalarda xavfsizlikni ta'minlash bo'yicha uslubiy tavsiyalar ishlab chiqilib tasdiqlandi. Shuningdek, murabbiylar attestatsiyasi reglamenti o'zgartirildi, hakamlar va murabbiylar uchun maxsus seminarlar hamda xavfsizlik choralarini kuchaytirishga bag'ishlangan Butunrossiya seminari tashkil etildi.

Bundan tashqari, Belgorod davlat milliy tadqiqot universiteti bazasida sportchilarda ma'naviy-axloqiy fazilatlarni tarbiyalashga qaratilgan malaka oshirish dasturi amalga oshirildi. Ushbu chora-tadbirlarning barchasi kelgusida bunday xavfli holatlarning oldini olishga qaratilgan.

Fojia yuz bergan Belogorsk shahridagi turnirda 16 yoshli o'smir jang qilish uchun shlemsiz chiqqani va bellashuv vaqtida bosh qismiga og'ir zarba qabul qilgani ma'lum qilingan. Shifoxonaga yotqizilganiga qaramay, u reanimatsiya bo'limida vafot etgan edi.