O'zbekiston va Belarus rahbarlari muloqot qildi 📞

O'zbekiston Respublikasi Prezidenti Shavkat Mirziyoyev va Belarus Respublikasi Prezidenti Aleksandr Lukashenko o'rtasida telefon orqali muloqot bo'lib o'tdi. Suhbatning asosiy e'tibor markazida amaliy hamkorlikni yanada rivojlantirish, sheriklik loyihalarini qo'llab-quvvatlash hamda faol gumanitar almashinuvni davom ettirish masalalari turdi.

Muloqot davomida Belarus rahbari O'zbekistondagi prezident saylovida qo'lga kiritilgan ishonchli g'alaba munosabati bilan davlatimiz rahbariga samimiy tabriklar yo'llab, O'zbekistonga ulkan muvaffaqiyatlar va farovonlik tilaklarini bildirdi.

Suhbat chog'ida ikki mamlakat o'rtasidagi savdo aylanmasining ijobiy o'sish sur'ati hamda tibbiyot, farmatsevtika, to'qimachilik va boshqa tarmoqlarda amalga oshirilayotgan loyihalar soni ortib borayotgani mamnuniyat bilan qayd etildi.

Madaniy-gumanitar yo'nalishdagi aloqalarga ham alohida e'tibor qaratildi. Joriy yilning aprel oyida Belarusda O'zbekiston madaniyati kunlari muvaffaqiyatli o'tkazilgan bo'lsa, may oyida Toshkent shahrida qo'shma kinokartinaning premьerasi bo'lib o'tdi.

Ikki mamlakat yetakchilari O'zbekiston – Belarus Hukumatlararo komissiyasi faoliyatini yanada faollashtirish muhimligini ta'kidladilar. Shuningdek, mintaqaviy tuzilmalar, jumladan Mustaqil Davlatlar Hamdo'stligi va Shanxay hamkorlik tashkiloti doirasidagi o'zaro hamkorlik masalalari ham ko'rib chiqildi.