🎾 Devis Kubogi: Shelton mag'lub bo'ldi

O'tgan hafta US Open finalida muvaffaqiyatli qatnashgan Ben Shelton Devis Kubogi doirasidagi bahsda kortga qaytdi, biroq Pragada bo'lib o'tgan saralash bosqichining ilk kunida chexiyalik raqibiga bas kela olmadi. AQSh va Chexiya terma jamoalari o'rtasidagi yakkalik bahslarining dastlabki kunida tomonlar g'alabalarni o'zaro bo'lishib olishdi.

Kun davomidagi ilk uchrashuvda AQSh vakili Lirner Tien Jakub Mensikni 6:2 va 6:4 hisobida mag'lubiyatga uchratdi. Shundan so'ng kortga chiqqan Ben Shelton Jirji Lehechka bilan bahs olib bordi. Ushbu uchrashuvda chexiyalik tennischi ustun kelib, Sheltonni 1 soatu 34 daqiqa davom etgan bahsda 6:4, 6:4 hisobida taslim etdi va umumiy hisobni tenglashtirdi.

Saralash uchrashuvlari shanba kuni yana uchta o'yin bilan davom etadi. Dastlab juftlik bahslarida amerikaliklar Kristian Xarrison va Ostin Kraychek chexiyalik Adam Pavlasek hamda Patrik Riknga qarshi kortga chiqishadi. Shundan so'ng navbatdagi yakkalik o'yinlarida Mensik Shelton bilan, Lehechka esa Tien bilan kuch sinashadi.

Ayni damda dunyoning turli burchaklarida o'tkazilayotgan Devis Kubogi saralash bellashuvlari noyabr oyida Italiyaning Bolonya shahrida bo'ladigan hal qiluvchi bosqichda amaldagi chempion Italiyaga qo'shiladigan qolgan yettita jamoani aniqlab beradi.

Dunyoning boshqa shaharlarida ham qiziqarli o'yinlar kuzatildi. Kvebek shahrida mezbon Kanada Fransiyaga qarshi bahsda 2:0 hisobida oldinga o'tib oldi. Reytingda 205-o'rinni egallab turgan Liam Draxl 32-raketka Artur Rinderknechni 6:2, 7:5 hisobida yengib sensatsiya qayd etdi, Feliks Oje-Aliassim esa Kventan Alisni taslim etdi. Vena shahrida Avstriya va Belgiya jamoalari g'alabalarni bo'lishib olgan bo'lsa, Seulda Janubiy Koreya Hindiston ustidan 2:0 hisobida ustun keldi.