2016-yilgi F1 mavsumi aprelda boshlanadi 🏎

Hozirgi kunda Formula 1 chempionati jiddiy inqirozli davrni boshdan kechirayotgani sir emas. Pirovardida trassadagi harakat kamayib, mashinalar sekinlashdi va sport o‘zining avvalgi jozibasini yo‘qotmoqda. Biroq sport rahbarlari chuqur o‘zgarishlar qilish o‘rniga shoshilinch yechimlar bilan vaziyatni saqlab qolishga urinishmoqda. Shunday choralardan biri 2016-yilgi mavsum bilan bog‘liq bo‘lib, chempionat odatdagi kabi mart oyida emas, balki aprel oyida boshlanishi aniq bo‘ldi.

Taniqli Autosport nashrining xabar berishicha, bu qadamdan ko‘zlangan asosiy maqsad taqvimni imkon qadar ixchamlashtirishdir. Natijada poygalar orasidagi uch haftalik uzoq tanaffuslar hamda Germaniya Gran-prisi bilan sodir bo‘lganidek, kutilmagan bekor qilinishlar vaqtida yuzaga keladigan bo‘shliqlarning oldi olinadi.

Kelgusi yilgi dastlabki taqvim loyihasiga ko‘ra, mavsumning ilk bosqichi 3-aprel kuni Avstraliya Gran-prisi bilan boshlanadi. Janubiy yarimsharda yilning birinchi yarmida kunlar qisqarib borishi sababli, Avstraliya poygasi qorong‘i tushishining oldini olish uchun o‘z vaqtini biroz oldinga surishiga to‘g‘ri keladi.

Bunday kech boshlanish holati oxirgi marta 1988-yilda kuzatilgan edi. Oshnada ham mavsum 3-aprel kuni Braziliyaning Rio-de-Janeyro shahridagi trassada boshlangan bo‘lib, shuncha kechikishga qaramay, chempionat an’anaviy tarzda noyabr oyida yakunlanishi kutilmoqda.

Taqvimni siqiqroq qilishning yana bir sababi xarajatlarni kamaytirishdir. Jamoalar har ikki Gran-pari oralig‘ida Yevropaga qaytib kelishiga hojat qolmasligi uchun Moto GP chempionatidagidek ketma-ket haftalarda o‘tkaziladigan xorijiy poygalarni ko‘rishimiz mumkin.

Shunga qaramay, kelgusi mavsumda nechta bosqich bo‘lishi hozircha noma’lum. Klassik avtodromlar iqtisodiy qiyinchiliklarga duch kelayotgan bir paytda, chempionat Yevropadan tashqi hududlarga ko‘proq e’tibor qaratmoqda. Hali rasmiy taqvim to‘liq tasdiqlanmagan bo‘lsa-da, ishqibozlar kelgusi yili mavsum startini yana bir oy kutishiga to‘g‘ri kelishi tobora oydinlashmoqda.