V. van Deyk Alissonning ketishi haqida gapirdi 🛑

Liverpul jamoasi sardori Virjil van Deyk darvozabon Alisson Bekkerning yozda jamoani tark etishi ehtimoli haqida o'z fikrlari bilan o'rtoqlashdi. Uning so'zlariga ko'ra, braziliyalik posbonning ketishi klub uchun katta yo'qotish bo'ladi, biroq har qanday holatda ham jamoa bunday o'zgarishlarga moslasha oladi.

2018-yilda Roma safidan kelib qo'shilgan Alisson shu vaqt ichida 330 dan ortiq uchrashuvda maydonga tushib, zamonaviy Liverpulning eng asosiy figuralaridan biriga aylandi. Shartnomasi 2027-yilgacha tuzilganiga qaramay, 33 yoshli futbolchining kelajagi borasidagi taxminlar kuchayib bormoqda. Oldinroq Endryu Robertson va Muhammad Saloh kabi yetakchilarning mavsum oxirida ketishi ma'lum bo'lgan edi, endi esa yana bir tajribali o'yinchi taqdiri muhokama markazida turibdi.

Bosh murabbiy Arni Slot ham agar bu klub manfaatlariga mos kelsa, transfer masalasi ko'rib chiqilishi mumkinligiga ishora qildi. Matbuotda esa Alisson bilan Yuventus qiziqayotgani hamda futbolchining o'zi ham A Seriyaga qaytishga qarshi emasligi haqida xabarlar tarqalmoqda. Van Deyk uzoq yillar davomida birga barcha quvonch va qiyinchiliklarni boshdan kechirgan do'stining Anfieldda qolishini istashini ochiq aytdi.

Shu bilan birga, so'nggi mavsumlarda jarohatlar ko'payib borayotgani va Jorji Mamardashvili kabi zaxira variantlari borligi klub oldida muhim qarorlarni qo'ymoqda. Hozirda tiklanish jarayonini boshdan kechirayotgan posbonning kelajagi bo'yicha rahbariya yaqin vaqt ichida yakuniy to'xtamga kelishi kutilmoqda.