FIDE shaxmat olimpiadasidagi muammolar uchun to‘lov qiladi ♟️

Samarqand shahrida mezbonlik qilinayotgan 46-Butunjahon shaxmat Olimpiadasining ilk kunlaridayoq viza hamda joylashtirish jarayonlarida qator tashkiliy muammolar yuzaga keldi. Bu holat musobaqaga tashrif buyurgan terma jamoalarning haqli e’tirozlariga sabab bo‘ldi. Xalqaro shaxmat federatsiyasi mazkur vaziyat yuzasidan tezkor bayonot berib, jabr ko‘rgan federatsiyalarga moliyaviy kompensatsiya ajratilishini ma’lum qildi.

Dastlab Afrika shaxmat konfederatsiyasi O‘zbekiston shaxmat federatsiyasi, musobaqa tashkilotchilari hamda FIDE saylov komissiyasiga norozilik yo‘lladi. Hujjatlar vaqtida topshirilganiga qaramay, ayrim afrikalik delegatlar viza ololmagan. Xususan, Namibiya terma jamoasining ikki a’zosiga aeroportda kirishga ruxsat berilmay ortga qaytarilgani sababli jamoa musobaqada to‘liq bo‘lmagan tarkibda qatnashishga majbur bo‘lmoqda. Madagaskar vakillari esa kechasi kelgan bo‘lsa-da, xonalarni olish uchun soatlab kutgan va ba’zilari tonggacha foyeda qolgan.

Shuningdek, Hindiston terma jamoasi ham joylashtirishdagi kamchiliklardan noroziligini bildirdi. Mahalliy qo‘mita xonalarni oldindan band qilmagani tufayli shaxmatchilar mehmonxonada ko‘p vaqt yo‘qotgan va bu holatni ijtimoiy tarmoqlarda qattiq tanqid qilgan. FIDE turar joy masalasidagi jiddiy kamchiliklardan chuqur afsusda ekanini bildirib, mehmonxonalarni ta’minlash mahalliy Tashkiliy qo‘mita vakolatiga kirishiga qaramay, yordam berishni o‘z burchi deb bilishini ta’kidladi.

Mazkur muammolarni bartaraf etish maqsadida FIDE qo‘shimcha mablag‘ ajratdi. Unga ko‘ra, o‘z mablag‘i evaziga xona ijaraga olgan barcha jamoalarning uch kungacha bo‘lgan xarajatlari to‘liq qoplanadi. Shuningdek, standartlarga javob bermaydigan mehmonxonalarda yashaganlarga ham kompensatsiya berilishi belgilandi. FIDE barcha jabrlanganlardan uzr so‘rab, asosiy maqsad har bir ishtirokchiga adolatli sharoit yaratish ekanini qayd etdi.