Шоҳжаҳон Эргашев Данияр Елеусиновни жангга чақирди 🥊

Ўзбекистонлик таниқли профессионал боксчи Шоҳжаҳон Эргашев навбатдаги жанг учун жиддий рақибни нишонга олди. Унга кўра, спортчига IBA Nomad лигаси томонидан Олимпиада чемпиони Данияр Елеусиновга қарши рингга чиқиш таклифи юборилган. Эргашев бу таклифни ҳеч қандай ikkilanishsiz қабул қилганини билдириб, рақибининг юқори мақоми уни янада руҳлантирганини ва у билан жанг қилишга тайёрлигини очиқ айтди.

Мазкур чақирув жамоатчилик ва мухлислар ўртасида катта қизиқиш уйғотгач, Олимпиада чемпиони Данияр Елеусинов ҳам узоқ куттирмасдан ўз муносабатини билдирди. Қозоғистонлик боксчи ўзининг Instagram саҳифасида Эргашевнинг сўзларига жавоб ёзиб, бу вазиятга бошқача нуқтаи назардан ёндашди.

Елеусиновнинг фикрича, ҳамкасби илгари унга қарши жанг қилишни истамаслигини айтган эди. Ҳозир эса у атайлаб, Елеусиновнинг яқин орада рингга чиқа олмаслигини аниқ билган ҳолдагина бундай баёнотлар бермоқда.

Қозоғистонлик спортчининг тушунтиришича, унинг ҳозирги пайтда жанг ўтказишига амалдаги шартномавий мажбуриятлари тўсқинлик қилади. Хусусан, Данияр Елеусинов айни пайтда Zuffa компанияси билан шартномага эга эканлигини ва шу сабабли бу жанг ҳозирча амалга ошмаслигини таъкидлаб ўтди.