Arina Sobolenko o'z qilmishini oqladi 🤬

AQSh ochiq chempionati doirasida belaruslik taniqli tennischi Arina Sobolenko yarim final uchrashuvida o'z jamoasiga nisbatan nima sababdan haqoratli so'zlar ishlatganiga oydinlik kiritdi. Ma'lumki, mazkur nufuzli musobaqa 28-avgustdan 10-sentyabrgacha bo'lgan muddatda o'tkazilmoqda.

Kortdagi o'yindan keyingi intervyuda sportchi og'ir kechgan yarim finallardan keyin jamoasi bilan o'zaro kelishib olganini ma'lum qildi. Uning so'zlariga ko'ra, agar hissiyotlarni tashqariga chiqarmasa, bu holat uni ich-ichidan yemirishi mumkin edi. Shu bois u murabbiylar va jamoa a'zolariga baqirib, so'kinganini tan oldi.

Shu bilan birga, tennischi o'z jamoasi uni yaxshi tushunishini va bularning barchasi ma'lum sabablarga ko'ra sodir bo'lganini bilishini ta'kidladi. U jamoasini baribir yaxshi ko'rishini qo'shimcha qildi.

Eslatib o'tamiz, mazkur yarim final bahsida Arina Sobolenko amerikalik Medison Kiz ustidan 0:6, 7:6 (7:1), 7:6 (10:5) hisobida irodali g'alabaga erishdi. Shundan so'ng u musobaqa finaliga chiqqanidan xursandligini yashirmadi va hal qiluvchi bahsda Kori Gauffga qarshi kortga chiqishi ma'lum bo'ldi.