Usman Nurmagomedov UFC'da jang qilishi mumkin 🥊

Mashhur aralash yakkakurashlar promousheni UFC o'z safiga yana bir taniqli jangchini qo'shib olish harakatini boshladi. Insayder Ruben Karterning ma'lum qilishicha, fransiyalik sportchi Benoit Sen-Deniga rossiyalik Usman Nurmagomedov UFCga o'tgan taqdirda uning ilk raqibi bo'lish taklifi berilgan. Mazkur shartnoma kelasi oyda imzolanishi kutilmoqda.

Manbaning xabariga ko'ra, tomonlar o'rtasidagi to'qnashuv joriy yilning 14-noyabr sanasida Nyu-York shahridagi mashhur "Medison-Skver-Garden" majmuasida bo'lib o'tadigan UFC 334 turnirida tashkil etilishi rejalashtirilgan. Hozircha rasmiy kelishuv yakuniga yetgani yo'q, biroq tayyorgarlik jarayonlari boshlab yuborilgan.

Eslatib o'tamiz, Usman Nurmagomedov PFL promousheni bilan tuzgan bitimi muddati tugagach erkin agent maqomini olgan edi. U avvalroq ushbu liganing har bir jang uchun 2 million dollar miqdoridagi taklifini rad etgan. Shuningdek, UFC rahbari Dana Uayt mag'lubiyatsiz chempionni o'z tashkilotiga jalb etish niyatida ekanini ochiqchasiga ma'lum qilgan.

Hozirning o'zida boshqa taniqli sportchilar ham bu ehtimoliy o'tishni faol muhokama qilishmoqda. Xususan, Islam Maxachev va Arman Saryukyan kabi yetakchi jangchilar Usmonning debyuti darhol yengil vazn toifasidagi kuchli o'ntarlik vakillariga qarshi kechishi mumkinligini ta'kidlashmoqda.