O'zbekiston Osiyo o'yinlarida g'alabani boy berdi ⚽

O'zbekiston ayollar terma jamoasi Yaponiyada davom etayotgan XX yozgi Osiyo o'yinlari futbol turniridagi ikkinchi uchrashuvini o'tkazdi. Ikkinchi tur doirasida vakillarimiz Xitoy jamoasi bilan to'qnash keldi va uchrashuv 1:1 hisobidagi durang natija bilan yakunlandi.

Bellashuv 17-sentabr kuni «Gifu Nagaragavi» stadionida bo'lib o'tdi. O'yinning birinchi bo'limi oxirlarida, aniqrog'i 41-daqiqada O'zbekiston safida Xolida Dadaboyeva raqib darvozasini ishg'ol qilib, jamoamizni oldinga olib chiqdi.

Uchrashuvning ikkinchi bo'limida Xitoy terma jamoasi hisobni tenglashtirishga muvaffaq bo'ldi. Bahsning 70-daqiqasida Lin Yan gol urib, muvozanatni tikladi va o'yin yakuniga qadar shu hisob saqlanib qoldi.

Kotrina Kulbite shogirdlari uchun mazkur natija turniradagi ikkinchi ketma-ket durang bo'ldi. Eslatib o'tamiz, musobaqaning birinchi turida ham O'zbekiston futbolchilari Filippin terma jamoasi bilan 1:1 hisobida durang o'ynab, g'alabani qo'ldan chiqargan edi. Shu tariqa, dastlabki ikki turdan so'ng jamoamiz hisobidagi ochkolar soni ikkitaga yetdi.

Guruh bosqichining so'nggi, uchinchi turida O'zbekiston terma jamoasi Gonkong jamoasiga qarshi maydonga tushadi. Ushbu hal qiluvchi bahs 21-sentabr sanasiga belgilangan.