Futzalchilarimiz Vengriyani yengdi ⚽

Oʻzbekiston futzal boʻyicha milliy terma jamoasi Vengriyaga qarshi safar oʻrtoqlik oʻyinida muvaffaqiyat qozondi. Ushbu uchrashuv Vengriyaning Budaers shahrida tashkil etilib, keskin kurashlarga boy oʻtdi.

Oʻyin taqdirini yagona gol hal qildi. Oʻzbekiston futzal federatsiyasi maʼlumotiga koʻra, uchrashuvdagi yagona toʻpni 11-daqiqada Ilhomjon Hamroev raqib darvozasiga kiritdi va jamoamizni oldinga olib chiqdi.

Ikkinchi boʻlimda mezbonlar faollashib, hujumlarni kuchaytirdilar va bir nechta xavfli vaziyatlar yaratishdi. Oʻyin yakuniga besh daqiqa qolganida Vengriya murabbiylar shtabi darvozabonni maydondan olib, uning oʻrniga beshinchi oʻyinchi taktikasidan foydalandi. Shunga qaramay, Oʻzbekiston futzalchilari himoyada toʻgʻri harakat qilib, minimal ustunlikni saqlab qolishdi. Oʻyin oxirlarida esa jamoamizni darvoza ustuni ham qutqarib qoldi.

Qayd etish joizki, jahon reytingida Oʻzbekiston 21-oʻrinni egallab turgan boʻlsa, Vengriya terma jamoasi 30-pogʻonadan joy olgan. Vengriya futbol federatsiyasi matbuot xizmatining xabar berishicha, mazkur jamoalar 19 sentyabr kuni shu maydonning oʻzida ikkinchi oʻrtoqlik oʻyinida ham oʻzaro bahslashadilar. Ushbu javob uchrashuvi mahalliy vaqt bilan soat 16:00 da boshlanishi rejalashtirilgan.