Maks Verstappen F1'ni tark etishni o'ylagan 🏎

To'rt karra Formula 1 jahon chempioni Maks Verstappen o'tgan oy Red Bull bilan yangi shartnoma imzolashdan oldin chempionatni tark etish yoki boshqa jamoaga o'tish haqida jiddiy o'ylab ko'rganini ma'lum qildi. 28 yoshli niderlandiyalik poygachi 2030 yilgacha mo'ljallangan amaldagi bitimni imzolagunga qadar faoliyatini yakunlash haqidagi fikrlari hamda McLaren jamoasi bilan olib borgan muzokaralari xususida Germaniyaning Bild nashriga intervyu berdi. Uning so'zlariga ko'ra, har qanday boshqa jamoa bilan bo'ladigan muzokaraga jiddiy munosabatda bo'lish talab etiladi, biroq yakunda u boshqa jamoaga o'tgandan ko'ra Formula 1'dagi faoliyatini to'xtatishga yaqinroq turgan.

2021-2024 yillar oralig'ida ketma-ket to'rt marta chempionlikni qo'lga kiritgan Verstappen joriy mavsumda hali g'alaba qozonmagan. Yakshanba kuni Madridda bo'lib o'tgan Ispaniya Gran-prisi natijalariga ko'ra ikkinchi o'rinni egallagan sportchi umumiy jadvalda 6-poygachini egallab turibdi va peshqadam Kimi Antonellidan 147 ochko ortda qolmoqda. U yangi shartnomani imzolashda hech qanday tashqi bosim bo'lmaganini ta'kidlab, tomonlar o'zaro hamkorlikni uzoq muddatga davom ettirmoqchi bo'lsa, kutishdan ma'no yo'qligini qo'shimcha qildi.

Verstappen tanqidlar unga ta'sir qilmasligini va boshqalarning fikri bilan qiziqmasligini bildirdi. Uning fikricha, eng muhimi oilasi, menejmenti, jamoasi va o'zining his-tuyg'ularidir. Shuningdek, u chempionatda o'ziga isbotlashi kerak bo'lgan hech qanday narsa qolmaganini, chunki birinchi chempionlikdanoq barcha narsaga erishganini qayd etdi.

Poygachi Fernando Alonsodan farqli o'laroq, 40 yoshida ham poyga qilishda davom etishini kutmayotganini, ammo zavq olguncha faoliyatini davom ettirishini aytdi. Formula 1 musobaqalari ikki haftadan so'ng Ozarbayjon Gran-prisi bilan davom etadi.