Sauber jamoasida muhim kadrlar o'zgarishi 🏎

Shveytsariyaning Sauber jamoasida keng ko'lamli o'zgarishlar davom etmoqda va Xinvilda bir qator yangi tayinlovlar amalga oshirildi. Ushbu kadrlar o'zgarishlari jamoaning kelgusida Audi zavod jamoasiga aylanishi jarayoni bilan bevosita bog'liq ekanligi ta'kidlandi.

Jamoada yangi bosh poyga muhandisi lavozimi joriy etilib, bu vazifaga Jampaolo Dall'Ara tayinlandi. U poyga brigadasining ham trassadagi, ham bazadagi faoliyati uchun javobgar bo'ladi. Dall'Ara o'z vaqtida Alfa Romeo va Sauber Motorsport jamoalarida rahbarlik lavozimlarida ishlagan bo'lib, 2016 yildan beri o'zining konsalting kompaniyasini boshqarib kelayotgandi.

Shuningdek, Ignasio Rueda sport direktori lavozimini egallaydi. Ispaniyalik muhandis avvalroq Jordan, Renault, Lotus F1 Team kabi jamoalarda faoliyat yuritgan va so'nggi yillarda Ferrari jamoasining sport direktori bo'lgan.

Jamoaning 58 yoshli faxriysi Beat Senders 1980-yillardan buyon Sauber safida ishlab kelmoqda. U 2025 yilda tarixiy dasturlar bo'limiga boshchilik qiladi. Senders yangi lavozimidan tashqari, jamoaning o'tish davridagi umumiy qayta qurish jarayonini ham nazorat qilib boradi.