🏒 "Los Anjeles Kings" Kvebekda mashg‘ulotlarni boshladi!

"Los Anjeles Kings" xokkey klubi mavsumoldi tayyorgarlik jarayonini Kvebek shahrida davom ettirmoqda. Jamoa "Videotron Centre" arenasida mashg‘ulot o‘tkazish uchun muzga chiqdi. Bu yerda to‘rt kun davomida tayyorgarlik ko‘rib, Sharqiy qirg‘oqda mavsumoldi so‘nggi ikkita o‘yinni o‘tkazish rejalashtirilgan. Xususan, jamoa payshanba kuni "Boston"ni, shanba kuni esa "Florida"ni qabul qiladi.

So‘nggi kunlardagi o‘zgarishlardan so‘ng, yig‘inning so‘nggi bosqichi uchun jamoa tarkibi shakllandi. Kvebekga kelgan 26 nafar xokkeychi orasida 15 ta hujumchi, 8 ta himoyachi va 3 ta darvozabon mavjud. Xususan, hujumchilar qatoridan Kuinton Bayfild, Filipp Dano, Kevin Fiala va Anze Kopitar kabi yetakchilar o‘rin olgan. Himoyachilar safida Mayki Anderson, Brandt Klark va Vladislav Gavrikov bor. Darvozabonda esa Feniks Kopli, Darsi Kemper hamda David Rittix shug‘ullanmoqda.

Hozircha jamoada to‘rt nafar xokkeychi jarohat sababli safdan chiqqan. Dryu Duti to‘pig‘i singani va Artur Kaliyev o‘mrov suyagi singani sababli uzoq muddatga safdan chiqqan. Shuningdek, hujumchi Teylor Uord va himoyachi Koul Kriger ham jarohat sababli jamoa bilan birga emas. Himoyachi Yakob Moverarening taqdiri esa tez orada hal bo‘lishi kutilmoqda.

Klub mavsum ochilishiga qadar tarkibdagi 26 nafar o‘yinchidan uchtasini qisqartirishi kerak. "Kings" odatda ikkita darvozabon bilan harakat qilishi hisobga olinsa, murabbiylar shtabi yana ikkita qaror qabul qilishi lozim bo‘ladi. Mavsumdagi ilk o‘yin 10-oktabr kuni "Baffalo"ga qarshi o‘tkazilishi belgilangan.