✈️ AZAL Samarqandga qatnov ochmoqda

Ozarbayjon Prezidenti Ilhom Aliyevning Samarqanddagi ShHT sammitidagi ishtiroki Ozarbayjon va O‘zbekiston o‘rtasidagi strategik sheriklik yangi bosqichga ko‘tarilganini yana bir bor yaqqol namoyon etdi. Ushbu siyosiy va iqtisodiy aloqalarning mustahkamlanib borishi fonida ikki davlat o‘rtasidagi parvozlar geografiyasini kengaytirish bo‘yicha faol ishlar davom ettirilmoqda.

Jumladan, oktabr oyining boshidan boshlab Ozarbayjonning milliy aviatashuvchisi bo‘lgan AZAL kompaniyasi O‘zbekistonning yana bir ko‘hna shahriga qatnovlarni boshlashni rejalashtirgan. Dunyoning eng qadimiy shaharlaridan biri bo‘lgan Samarqandga parvozlar haftasiga ikki marotaba — har hafta seshanba va juma kunlari amalga oshirilishi ko‘zda tutilgan.

Bundan tashqari, Ozarbayjon havo yo‘llari Boku-Toshkent-Boku yo‘nalishida bajariladigan parvozlar chastotasini oshiradi. Unga ko‘ra, endilikda ushbu yo‘nalishdagi reyslar haftasiga 5 martagacha ko‘paytiriladi.

Hozirgi vaqtda ikki poytaxt o‘rtasidagi muntazam parvozlar dushanba, chorshanba va shanba kunlari bajarilmoqda. Tez orada esa bu ro‘yxatga payshanba va yakshanba kunlari ham qo‘shilishi rejalashtirilgan.