Yuki Sunoda Kobayashining natijalarini yangilamoqchi 🏎

Formula 1 chempionatida ishtirok etayotgan yaponiyalik poygachi Yuki Sunoda o‘z vatandoshining tarixiy natijalaridan o‘zib ketish niyatida ekanini bildirdi. Hozirgi kunda RB jamoasi sharafini himoya qilayotgan sportchining so‘zlariga ko‘ra, u Formula 1 da eng muvaffaqiyatli yapon poygachisi bo‘lgan Kamui Kobayashining yutuqlarini takrorlash va undan ham yuqoriga ko‘tarilishni istaydi.

Ma’lumot uchun, shu paytgacha F1 da eng yaxshi natija ko‘rsatgan yaponiyalik uchuvchi Kamui Kobayash hisoblanadi. U 2012-yilda Sauber jamoasi safida o‘z vatanidagi Gran-prida uchinchi o‘rinni egallab, shohsupaga ko‘tarilgan edi. Faoliyatini yakunlagach, u chidamlilik poygalariga o‘tib, Toyota jamoasi bilan ikki karra jahon chempioni unvonini olgan hamda Le-Man 24 soatlik poygasida zafar quchgan.

Yuki Sunoda esa 2021-yildan beri ushbu chempionatda qatnashib kelmoqda. U Singapurning The Straits Times nashriga bergan intervyusida avvalgi avlod poygachilari Takuma Sato va Kamui Kobayashining yo‘li keyingi avlod uchun zamin yaratganini minnatdorlik bilan e’tirof etdi. Hozircha Sunoda hisobida 83 ochko mavjud bo‘lsa, Kobayashida bu ko‘rsatkich 125 ochkoni tashkil qiladi.

Shunga qaramay, Yuki 18-nchi yaponiyalik F1 poygachisi sifatida ushbu milliy rekordni yangilashiga ishonchi komil. U kelajakda jahon chempioni unvonini qo‘lga kiritishni maqsad qilgan. Shuningdek, sportchi hozircha o‘z hissiyotlarini jilovlashni o‘rganish hamda zaif tomonlarini bartaraf etish ustida ishlayotganini qo‘shimcha qildi.