Kapadze: Jaloliddinov foyda keltiradi ⚽️

Timur Kapadze boshchiligidagi "Olimpik" jamoasi o'quv-mashg'ulot yig'inlari doirasida Bosniyaning "Veles Mostar" klubi bilan bahs olib bordi va 2:1 hisobida zafar quchdi. Uchrashuvdan so'ng bosh murabbiy "Championat.Asia" nashriga eksklyuziv intervyu berib, jamoaning hozirgi holati va mavsumoldi tayyorgarligi haqida gapirib o'tdi.

Mutaxassisning so'zlariga ko'ra, yig'in rejadagidek davom etmoqda va ayni paytda futbolchilar yuqori jismoniy yuklamalarni bajarishmoqda. Murabbiy bunday og'ir sharoitda ham o'yinlar o'tkazish muhimligini, vaqt o'tib futbolchilarga biroz yengilroq bo'lishini ta'kidladi. Shuningdek, yig'in davomida jiddiy jarohatlar yo'qligi va barcha o'yinchilarga o'zini ko'rsatish uchun imkoniyat berilayotgani quvonarli holat ekanligi qayd etildi.

Intervyu davomida Jasur Jaloliddinovning xarakteri va uning maydondagi hissiyotlariga ham alohida e'tibor qaratildi. Kapadze futbolchi endi yosh bola emasligini, uning o'z aqli borligini va asosiy masala bu hissiyotlar mojaroga aylanib ketmasligini ta'kidladi. Murabbiy bu borada futbolchi bilan ishlashini, Jasur mashg'ulotlar hamda o'yinlarda o'zining eng yaxshi fazilatlarini ko'rsatib, jismoniy holatini yaxshilaganini va kelgusida jamoaga katta foyda keltirishini qo'shimcha qildi.

Shuningdek, mavsum boshlanishiga bir oy qolgani, biroq Superliga taqvimi hali e'lon qilinmagani tayyorgarlik jarayoniga o'z ta'sirini ko'rsatayotgani tilga olindi. Birinchi turdagi raqiblar kimligini bilmaslik ma'lum noqulayliklar tug'dirmoqda. Jamoa 17-fevral kuni Toshkentga qaytib, yana bir o'rtoqlik o'yini o'tkazishi va shundan keyin qolgan rejalarni belgilashi aytildi.

Tarkibdagi o'zgarishlarga to'xtalib o'tgan Kapadze, joriy yig'in yangi o'yinchilar uchun o'zlarini namoyon qilishda ajoyib imkoniyat ekanligini bildirdi. Agar futbolchilar munosib harakat qilib, tinimsiz mehnat qilishsa, jamoada qolishlari mumkin. Raqobat kuchli bo'lib, tarkibdan joy hech kimga kafolatlanmagan.