Umar Kremlyov Tramp o‘g‘lining to‘yini moliyalashtirgan 🥊

Rossiyalik tadbirkor va Xalqaro boks assotsiatsiyasi prezidenti Umar Kremlyov AQSH prezidenti Donald Trampning farzandi kichik Donald Trampning Bagama orollarida o‘tkazilgan nikoh to‘yi xarajatlarining asosiy qismini o‘z mablag‘lari hisobidan qoplab berdi. Bu haqda o‘z manbalariga tayanib Meduza nashri xabar tarqatdi.

Ma’lumotlarga ko‘ra, tadbirkor yuz minglab dollar miqdoridagi xarajatlarni to‘lagan bo‘lib, bu summaga orol ijarasi, mushakbozlik va tadbirni tashkil etish bilan bog‘liq boshqa xizmatlar kiradi. Moliyaviy mablag‘lar IBA bilan aloqador bo‘lgan Dubaydagi tijorat tuzilmasi orqali yo‘naltirilgani e’tiborni tortadi. Kichik Trampning aytishicha, o‘tgan oy oxirida bo‘lib o‘tgan bazmda ellikka yaqin eng yaqin mehmonlar qatnashgan, biroq taklif etilganlar orasida rusiyzabonlar ko‘pligi va ularning safida ingliz tilini bilmaydigan Kremlyovning borligi boshqalarda ajablanish uyg‘otgan.

Kichik Trampning matbuot kotibi xarajatlar rossiyalik badavlat shaxs tomonidan qoplangani haqidagi ma’lumotni rad etmagan va ularni tabiat hamda sportga bo‘lgan qiziqish bog‘lab turishini ta’kidlagan. Shu bilan birga, Erik Trampning matbuot kotibi Umar Kremlyovni umuman tanimasligini bildirgan. IBA hamda tadbirkorning vakillari uyushma to‘y xarajatlarini to‘lamaganini da’vo qilgan, biroq Dubaydagi kompaniya orqali o‘tkazilgan tranzaksiyalar yuzasidan izoh berishni istamagan.

Ochiq manbalardagi surishtiruvlarga ko‘ra, Umar Kremlyov avval boshqa familiyada bo‘lgan va o‘tmishda sudlangan. Keyinchalik u yuqori lavozimdagi shaxslar bilan yaqinlashib, sport tashkilotiga rahbar etib tayinlangan va vaqt o‘tishi bilan qator yirik biznes aktivlariga egalik qilgan. Eslatib o‘tamiz, Kremlyov rahbarlik qilayotgan Xalqaro boks assotsiatsiyasi 2020-yildan beri uning boshqaruvi ostida faoliyat yuritib kelmoqda va avvalroq moliyaviy shaffoflik muammolari sabab Xalqaro olimpiya qo‘mitasi tomonidan olimpiada musobaqalarini o‘tkazish huquqidan mahrum qilingan edi.