Gabriel Lundberg "Partizan"ga o'tdi 🏀

Gabriel Lundberg Italiyadagi faoliyatini yakunlab, Serbiyaning "Partizan Mozzart Bet" jamoasiga o'tdi va "Mozzart Sport" nashriga o'zining ilk intervyusini berdi. Daniyalik basketbolchi yangi loyihaning bir qismi bo'lishdan hayajondaligini va Belgradda o'ynash imkoniyatini qo'ldan boy bera olmaganini aytdi. U ilgari raqib sifatida maydonga tushgan vaqtida bu jamoaning muxlislari va muhitidan qattiq ta'sirlangani uchun bir kun kelib shu yerda to'p tepishni xayol qilganini tan oldi.

Basketbolchi bosh murabbiy Jelko Obradovich bilan bo'lgan ilk suhbatini ham esga oldi. Uning aytishicha, Yevroligada eng ko'p sovrin yutgan murabbiy unga o'zi qo'ng'iroq qilib, "Partizan"ga qiziqishini so'ragan. Lundberg darhol ijobiy javob bergan va tomonlar qisqa fursatda kelishuvga erishgan. U Obradovich bilan suhbatda maydondagi daqiqalar va o'z roli haqida umuman gaplashmaganini, chunki bunday darajadagi murabbiy chaqirganda buni so'rab o'tirish noto'g'ri ekanini ta'kidladi.

O'tgan mavsumda "Virtus" safida Yevroligadagi eng muhim o'yinchilardan biriga aylangan Lundberg yangi jamoasida ham asosiy figuralardan biri bo'lishi kutilmoqda. U o'yinchi sifatida boshlang'ich beshlikda ham, zaxiradan tushib ham foyda keltira olishini bildirdi. Shuningdek, u ijtimoiy tarmoqlardagi mish-mashlar to'g'ri bo'lsa, "Partizan" har bir pozitsiyada kuchli tarkibga ega bo'lishini va asosiy vazifa yig'inda jamoaviy kimyoni shakllantirishdan iborat bo'lishini qayd etdi.

Eslatib o'tamiz, Lundberg o'tgan mavsumda "Virtus" safida Obradovich jamoasiga qarshi bahslarda hal qiluvchi ochkolarni jamg'argandi. Xususan, u Belgraddagi o'yinda 16 ochko jamg'arib jamoasiga g'alaba keltirgan bo'lsa, Boloniyadagi bahsning so'nggi besh daqiqasida 20 balldan 11 tasini kiritib, belgradliklarga og'ir mag'lubiyat taqdim etgandi. Endilikda o'sha muxlislar uni raqib sifatida emas, o'z jamoasining yetakchisi sifatida qo'llab-quvvatlaydi.