Oʻzbekiston Suriyaga qarshi oʻynaydi 🇺🇿

Oʻzbekiston milliy terma jamoasi sentyabr va oktyabr oylaridagi FIFA kunlari doirasida bir nechta nufuzli oʻrtoqlik uchrashuvlarini oʻtkazishi rejalashtirilgan. Oʻzbekiston futbol assotsiatsiyasi tarqatgan rasmiy maʼlumotga koʻra, terma jamoamiz 1-oktyabr kuni Suriya termasiga qarshi maydonga tushadi.

Ushbu yigʻin doirasida futbolchilarimiz yana ikki qitʼa grandiga qarshi bahs olib borishi oldindan maʼlum qilingan edi. Xususan, Eronga qarshi oʻrtoqlik uchrashuvi 24-sentyabr kuni Fargʻona shahridagi «Istiqlol» stadionida boʻlib oʻtadi. Shuningdek, Janubiy Koreya terma jamoasiga qarshi safar uchrashuvi 6-oktyabr kunga belgilangan.

Hozirgi kunda terma jamoamiz Jahon chempionatidagi ishtirokini yakunlab, kelgusi yirik musobaqa — 2027-yilgi Osiyo Kubogiga tayyorgarlik bosqichini boshlagan. Mazkur qitʼa chempionati 7-yanvardan 5-fevralga qadar Saudiya Arabistoni yashil maydonlarida oʻtkazilishi koʻzda tutilgan.

Fabio Kannavaro shogirdlari musobaqaning «B» guruhidan joy olgan boʻlib, pley-off yoʻllanmasi uchun Bahrayn, Shimoliy Koreya va Iordaniya terma jamoalariga qarshi bahs olib boradilar. Bundan tashqari, tarqalgan xabarlarga koʻra, «oq boʻrilar» Janubiy Koreyaga qarshi oʻyindan soʻng Lionel Messi sardorligidagi Argentina terma jamoasiga qarshi ham maydonga tushishi mumkin.