Qozog‘iston ilk bor yevrokubok finaliga mezbonlik qiladi 🏆

Yevropa futbol assotsiatsiyalari ittifoqi kelgusi yillarda o'tkziladigan yevrokuboklarning hal qiluvchi final uchrashuvlariga mezbonlik qiladigan shaharlarni rasman e'lon qildi. Mazkur muhim qaror tashkilot Ijroiya qo'mitasining Saloniki shahrida o'tkazilgan yig'ilishida qabul qilindi.

Musobaqalar taqvimiga ko'ra, eng e'tiborga molik voqealardan biri Qozog'istonda sodir bo'ladi. Chempionlar Ligasi hamda Yevropa Ligasi g'oliblarini aniqlab beruvchi 2028-yilgi UEFA Superkubogi bahsi Ostonadagi “Ostona Arena” stadionida bo'lib o'tadi. Shu tariqa, Qozog'iston o'z futbol tarixida ilk bor yevrokubok finaliga mezbonlik qilish huquqini qo'lga kiritdi. 2027-yilgi Superkubok uchrashuvi esa Amsterdamdagi “Yoxan Kroyf Arena”sida tashkil etilishi belgilandi.

Shuningdek, Yevropaning eng nufuzli musobaqasi bo'lgan Chempionlar Ligasining 2027/28-yilgi mavsum finaliga Myunxendagi “Allianz Arena” stadioni mezbonlik qilishi ma'lum bo'ldi. 2028/29-yilgi hal qiluvchi o'yin esa Barselona shahridagi mashhur “Kamp Nou” o'yingohida bo'lib o'tadi.

Yevropa Ligasining 2027/28-yilgi mavsum finali Buxarestdagi “Milliy” stadionga topshirilgan bo'lsa, 2028/29-yilgi final bellashuvi Belgraddagi “Milliy” stadionda o'tkaziladi. Bundan tashqari, Konferensiyalar Ligasining ushbu mavsumlardagi hal qiluvchi o'yinlarini qabul qiladigan arenaslar ham aniqlandi: Turindagi “Yuventus” stadioni hamda Budapeshtdagi “Pushkash Arena” mazkur finallarga mezbonlik qiladi.