🥋 Akbar Abdullaev UFC bilan shartnoma imzoladi

Dana White's Contender Series doirasidagi so'nggi janglar o'z nihoyasiga yetdi va turnir yakunlariga ko'ra eng yorqin g'alaba qozongan to'rt nafar sportchi dunyodagi eng nufuzli promoushen - UFC bilan shartnoma imzolash huquqini qo'lga kiritdi. Quvonarlisi, mazkur muvaffaqiyatga erishgan jangchilar orasida hamyurtimiz ham bor.

Qirg'izistonlik iqtidorli yengil vazn vakili Akbar Abdullaev o'zining navbatdagi jangida Ednilson Santosga qarshi oktagonga chiqdi. Abdullaev raqibiga deyarli imkon qoldirmadi va atigi 19 soniya ichida yorqin nokaut evaziga g'alabani qo'lga kiritdi. Ushbu ta'sirli natija unga UFC bilan shartnoma imzolash imkoniyatini taqdim etdi va uning professional rekordidagi mag'lubiyatsiz seriyasi 14 taga yetdi.

Turnir doirasida boshqa vazn toifalarida ham muddatidan avval yakunlangan janglar kuzatildi. Jumladan, yarim o'rta vazn toifasida jang qilgan Mayton Pereyra Zivan Xantni atigi 45 soniya ichida nokautga uchratdi. Shuningdek, o'rta vazn vakili Igor Kavalkanti Oskar Ravelloni birinchi raundning 1:38-daqiqasidanoq texnik nokaut evaziga taslim etdi.

Yana bir o'rta vaznli jangchi Luis Ernandes esa Ugo Giyon ustidan g'alaba qozondi. Ernandes ikkinchi raundning 1:01-daqiqasida muvaffaqiyatli bo'g'ish usulini qo'llab, raqibini taslim etishga majbur qildi va UFC yo'llanmasini qo'lga kiritgan to'rtinchi jangchiga aylandi.

Musobaqada jami beshta g'olib aniqlangan bo'lib, ulardan faqat to'rt nafarigagina UFC shartnomasi nasib etdi. Beshinchi g'olib bo'lgan Teyшон Uilyams hakamlar qaroriga ko'ra ochkolar evaziga zafar quchgan bo'lsa-da, promoushen rahbariyati unga hozircha shartnoma taklif qilmaslikka qaror qildi.