Maykl Peyj UFC qaroridan ranjidimi? 🥊

Britaniyalik yarim oʻrta vaznli aralash yakkakurashlar ustasi Maykl Peyj UFC promousheni uning shartnomasini uzaytirmagani yuzasidan oʻz fikrlari bilan oʻrtoqlashdi. Professional faoliyatida 26 ta gʻalaba va 3 ta magʻlubiyat qayd etgan sportchi mazkur qarorni kutilmagan holat deb atadi. uning soʻzlariga koʻra, tomonlar kelgusida muzokara stoliga oʻtirishi kutilgandi, biroq vaziyat boshqacha tus oldi va u buni oʻziga nisbatan hurmatsizlik sifatida qabul qildi.

Peyj jang yakunida unga mikrofon berilib oʻz fikrini bildirishiga yoʻl qoʻyilmaganidan gʻazablanganini yashirmadi. Uning ta'kidlashicha, ba'zida ancha sust kechgan janglardan keyin ham sportchilarga fikr bildirish uchun imkon beriladi, biroq uning oʻzi bilan bogʻliq vaziyatda bu holat ikkinchi bor takrorlanmoqda. Shartnoma imzolanmasligi haqidagi xabarni u boshqa barcha bilan bir vaqtda eshitgan.

Sportchi rahbariyatning uning chiqishlaridan noroziligini ochiq aytmagani, muammolar yoki kelgusidagi ishga yondashuv haqida oldindan ogohlantirmaganidan norozi. Uning fikricha, agar kamchiliklar koʻrsatib oʻtilganida, u nima ustida ishlashi kerakligini va biznes munosabatlari qanday ekanini aniq tushungan boʻlardi. Oʻzaro munosabatlarga aniqlik kiritilmagani va hatto xayrlashuv jarayonida ham minnatdorchilik bildirilmagani uni biroz ranjitgan.

Bunga qaramay, Peyj UFCdagi vaqtidan mamnun ekanini bildirib, tashkilot xodimlari va jamoa a'zolari haqida faqat ijobiy fikrlar bildirdi hamda ularga minnatdorlik xabarini yoʻllaganini aytdi. Oʻz imkoniyatlarini toʻliq koʻrsata olmaganidan afsuslanishiga qaramay, u hamon eng yuqori sport formasidagi raqiblarni magʻlub etayotganini ta'kidladi. Uning fikricha, asosiy muammo psixologik bosimda boʻlgan va u endilikda ortiqcha mas'uliyatni unutib, shunchaki jarayondan zavq olishga e'tibor qaratish kerakligini anglagan.