Turizmni rivojlantirish muhokama qilindi 🇺🇿

O‘zbekiston Respublikasi Prezidenti Shavkat Mirziyoyev 12 iyul kuni amaliy tashrif bilan mamlakatimizda bo‘lib turgan Jahon turizm tashkiloti (UNWTO) bosh kotibi Zurab Pololikashvilini qabul qildi. Muloqot davomida BMTning yetakchi tarmoq tashkiloti bilan zamonaviy turizm infratuzilmasini rivojlantirish hamda O‘zbekistondagi sayyohlik yo‘nalishlarini targ‘ib qilish borasidagi keng ko‘lamli hamkorlikni yanada chuqurlashtirish masalalari muhokama qilindi.

Uchrashuv avvalida UNWTO bosh kotibi Birlashgan Millatlar Tashkiloti tizimidagi tuzilmalar nomidan O‘zbekiston rahbarini prezident saylovidagi ishonchli g‘alabasi bilan samimiy tabriklab, farovonlik va ulkan muvaffaqiyatlar tiladi.

Suhbat chog‘ida joriy yildagi turizm sohasining eng muhim xalqaro tadbiri — oktyabr oyida Samarqand shahrida bo‘lib o‘tadigan UNWTO Bosh assambleyasining 25-yubiley sessiyasiga tayyorgarlik ko‘rish va uni o‘tkazish masalalariga asosiy e'tibor qaratildi.

Shuningdek, O‘zbekistonda qulay va zamonaviy turizm infratuzilmasini barpo etish bo‘yicha loyihalarni amalga oshirishga taniqli xorijiy brendlar hamda yetakchi investorlarni jalb qilish borasidagi amaliy aloqalarni kuchaytirish muhimligi qayd etildi.

Bundan tashqari, xalqaro imijni targ‘ib qilish, ta'lim sohasida qo‘shma tadbirlar o‘tkazish va yuqori malakali mutaxassislarni tayyorlash masalalari ham muhokama qilindi. Xususan, mamlakatimizda Xalqaro akademiya va UNWTO Tematik ofisini tashkil etish rejalashtirilgan.