🏎 F1 2027-yilgi taqvim e'lon qilindi!

Formula-1 muxlislari intiqib kutgan 2027-yilgi mavsum taqvimi rasman e'lon qilindi va u ko'plab muhim o'zgarishlarni o'z ichiga oladi. Xususan, musobaqa bosqichlarining umumiy soni o'zgarishsiz qolib, harimgidek 24 ta Gran-pridan iborat bo'lishi belgilandi. Biroq poygalar geografiyasida bir qator yangiliklar kuzatilib, taqvimga Turkiya hamda Portugaliya bosqichlari qo'shildi, Niderlandiya va Barselona esa musobaqani tark etdi.

Eng asosiy yangiliklardan biri bu sprint poygalari sonining keskin oshishi bo'ldi. Endilikda qisqa poygalar soni 6 tadan 10 taga ko'tarildi va ular qatoriga ilk bor Monako hamda Monza traklari ham kiritildi. Mavsum oldi sinovlari fevral oyining oxirida Sakhirda bo'lib o'tsa, chempionatning o'zi mart oyining o'rtalarida Bahrayn Gran-prisi bilan start oladi.

Sprint poygalarining asosiy qismi mavsum boshida va yakunida jamlangan. Xususan, dastlabki to'rtta bosqichdan uchtasida (Bahrayn, Avstraliya va Yaponiya), shuningdek, oxirgi to'rtta poygadan uchtasida (Braziliya, Qatar va Abu-Dabi) sprint tashkil etiladi. Shuningdek, mavsum o'rtasida Monako va Monza bilan birga Kanada va Buyuk Britaniyada ham qisqa poygalar o'tkazilishi belgilandi.

2027-yilgi taqvim mart oyidagi Bahrayn bosqichi bilan boshlanib, dekabr oyining o'rtalarida Abu-Dabi Gran-prisi bilan o'z nihoyasiga yetadi. Kalendar davomida Saudiya Arabistoni, Xitoy, Mayami, Avstriya, Belgiya, Vengriya, Madrid, Ozarbayjon, Singapur, Ostin, Mexiko va Las-Vegas shaharlaridagi poygalar ham rejalashtirilgan.