JJ Gabriel "Manchester Yunayted"ni tark etishi mumkin 🚨

Manchester Yunayted" klubi o'zining yosh yulduzi JJ Gabriel bilan bog'liq kutilmagan muammoga duch keldi. 15 yoshli hujumkor futbolchi "qizil iblislar" safidan ketishni va amaldagi shartnomasini bekor qilishni xohlayotganini ma'lum qildi. Ushbu holat klub rahbariyatini tashvishga solib qo'ydi, chunki futbolchi kelajakda jamoaning asosiy yulduziga aylanishi kutilayotgan edi.

Odatda yosh futbolchilarning xorijga transfer qilinishi FIFA qoidalari bo'yicha qattiq cheklangan. Biroq Gabrielning oilaviy sharoiti unga Yevropa klublariga o'tish imkonini beruvchi istisnodan foydalanish yo'lini ochib beradi. Uning otasi Irlandiya terma jamoasi safida o'ynagan Joe O'Cearuill bo'lib, onasi esa kiprlik. Bu esa futbolchiga Irlandiya yoki Kipr pasportini olish imkonini beradi.

Joriy yilning 6 oktyabrida 16 yoshga to'ladigan futbolchi Yevropa Ittifoqi fuqarosi sifatida Yevropa iqtisodiy hududi doirasida transfer qoidalaridagi o'ziga xos bo'shliqdan foydalana oladi. Natijada "Real Madrid", "Barselona", Bavariya va PSJ kabi Yevropaning yetakchi klublari uning ortidan poygaga kirishdi. Xabarlarga ko'ra, "Real Madrid" uni o'zining "Kastilya" jamoasiga qo'shib olishga tayyor holda bu kurashda peshqadamlik qilmoqda.

"Manchester Yunayted" esa hali ham futbolchi bilan amaldagi shartnomasi yana bir yil davom etishini inobatga olib, uni saqlab qolish uchun kurashni davom ettirmoqda. Shunga qaramay, futbolchining Yevropa pasportini olish imkoniyati unga o'z kelajagini o'zi hal qilish huquqini bermoqda. "The Telegraph" nashriga gapirgan manbalardan biri bu holatni "Barselona" o'z tarixida Messi hali asosiy tarkibda o'ynamasidan oldin uni yo'qotib qo'yganidek katta yo'qotish bo'lishini ta'kidladi.