🇺🇿 Oʻzbekiston Suriyani sinovdan oʻtkazadi

Oʻzbekiston milliy terma jamoasi oldinda turgan FIFA kunlari doirasida oʻrtoqlik oʻyinlari oʻtkazishni rejalashtirgan. Oʻzbekiston futbol assotsiatsiyasi tarqatgan maʼlumotlarga koʻra, terma jamoamiz joriy yilning 1-oktyabr sanasida Suriya milliy jamoasiga qarshi bahs olib boradi.

Mazkur yigʻin doirasida boshqa raqiblar bilan ham oʻyinlar tashkil etilishi avvalroq eʼlon qilingan edi. Unga koʻra, 24-sentyabr kuni Fargʻona shahridagi “Istiqlol” stadioni Eron terma jamoasiga qarshi oʻrtoqlik uchrashuviga mezbonlik qiladi. Shundan soʻng, 6-oktyabr kuni vakillarimiz safarda Janubiy Koreya jamoasiga qarshi maydonga tushishadi.

Oʻzbekiston milliy terma jamoasi Jahon chempionatidagi ishtirokini yakunlagach, endilikda asosiy eʼtiborni 2027-yilgi Osiyo Kubogiga tayyorgarlikka qaratmoqda. Ushbu qitʼa birinchiligi kelasi yilning 7-yanvaridan 5-fevraliga qadar Saudiya Arabistoni yashil maydonlarida boʻlib oʻtadi.

Musobaqaning qur’a natijalariga koʻra, Fabio Kannavaro boshchiligidagi jamoamiz “B” guruhidan joy olgan. Ular guruh bosqichidan muvaffaqiyatli oʻtish uchun Bahrayn, Shimoliy Koreya hamda Iordaniya terma jamoalariga qarshi bahslar oʻtkazishi belgilangan.

Shu bilan bir qatorda, matbuotda “oq boʻrilar” Janubiy Koreyaga qarshi oʻyindan keyin Lionel Messi boshchiligidagi Argentina terma jamoasi bilan ham oʻrtoqlik uchrashuvi oʻtkazishi mumkinligi haqida maʼlumotlar tarqalgan.