Karlos Sayns: Singapur g‘alabasini unutmayman 🏎

Formula 1 poygachisi Karlos Sayns Madridda o‘zining homiysi bo‘lmish Estrella Galicia tadbirida ishtirok etib, yakunlangan mavsum bo‘yicha o‘z fikrlari bilan o‘rtoqlashdi. Uning so‘zlariga ko‘ra, o‘tgan yilgi eng esda qolarli lahza Singapurdagi g‘alaba bo‘lib, u bu lahzani hech qachon unutmasligini ta’kidladi. Mavsum boshlanishi omadsiz kelganiga qaramay, jamoa vaziyatni o‘zgartirib, g‘alabani qo‘lga kiritishga muvaffaq bo‘ldi. Umuman olganda, yil juda og‘ir kechgan, shanba kunlari mashina tezkor ko‘rinsa-da, poygada ortda qolishlar kuzatilgan.

Poygachining ta’kidlashicha, Red Bull jamoasi joriy reglament talablarini juda yaxshi tushunadi va ularning asosiy ustunligi universal mashinaga egaligidadir. Ferrari jamoasidan bundan ortig‘ini talab qilib bo‘lmaydi, chunki xodimlar bor kuchini bermoqda. Sayns 2022 va 2023-yillarda bittadan g‘alabaga erishgan bo‘lsa, endilikda uning oldiga 2024-yilda ikkita poygada birinchi bo‘lish vazifasi qo‘yilgan. Raqiblarning ustunligi shundaki, Maks Verstappen g‘alaba qozonish uchun doim ham bor kuchini sarflashi shart emas edi.

Mavsum davomidagi asosiy muammolar qatoriga shinalarning tez eskirishi, uzun masofalarda tezlik yetishmasligi va tezkor burilishlardagi qiyinchiliklar kiritildi. Singapurda esa bu muammolar kuzatilmadi, bu ham muvaffaqiyatga erishishda muhim rol o‘ynadi. Sayns 2025-yilgi kelajagi borasida ham to‘xtalib o‘tib, yangi mavsum boshlangunga qadar o‘zining kelgusi jamoasi borasida aniqlikka erishishni va ko‘p yillik shartnoma imzolashni istashini bildirdi. U jamoa rahbaridan va umumiy jamoadan yetarlicha yordam hamda hurmat sezayotganini qo‘shimcha qildi.

Shuningdek, poygachi 24 ta Gran-pridan iborat taqvimga moslashish kerakligini, lekin bu mexaniklar va muhandislar uchun juda og‘ir yuk ekanligini ta’kidladi. Dam olish kunlarini to‘g‘ri taqsimlash va jismoniy holatni asrash muhim. Ispaniya Gran-prisi qayerda o‘tkazilishidan qat’i nazar, asosiy narsa musobaqa yuqori saviyada tashkil etilishi ekanligini, Madrid yoki Barselona tanlanishining unchalik farqi yo‘qligini aytdi.