Van Deyk hakamga dalda berdi ⚽

Niderlandiya terma jamoasining tajribali himoyachisi Virjil van Deyk Millatlar ligasidan o‘rin olgan Germaniyaga qarshi uchrashuv yakunlanganidan so‘ng o‘yin bosh hakami Ovidiu Xatesanga dalda berish uchun uning yoniga bordi. Mazkur bahs hakam uchun juda og‘ir ruhiy sharoitda o‘tgan edi.

Ma'lum bo‘lishicha, o‘yin boshlanishidan oldin ruminiyalik hakamning onasi hayotdan ko‘z yumgan. Og‘ir judolikka uchraganiga qaramay, u uchrashuvni boshqarib borishga majbur bo‘lgan va o‘yin tugagach o‘zini tutib tura olmagan.

Xatesanning maydonda ko‘zyosh to‘kib turganini ko‘rgan 27 yoshli niderlandiyalik futbolchi darhol uning oldiga borgan. Van Deyk hakamga chuqur ta'ziya izhor etib, uning og‘ir qayg‘usiga sherik ekanini bildirgan.

Matbuotga bergan izohida futbolchi hakamning ruhiy jihatdan ezilib qolgani va ko‘zlarida yosh bo‘lganini alohida ta'kidlagan. Virjil van Deyk bunday og‘ir damlarda unga kuchli bo‘lishni maslahat berganini ma'lum qildi.