"Pistons" ikkita basketbolchini o'z safiga qo'shdi 🏀

"Detroit Pistons" klubi rasman hujumchilar Douson Garsiya va Bashir Jixad bilan shartnoma imzolaganini, biroq darhol ularni transfer ro‘yxatidan chiqarganini e'lon qildi. Spotrac xodimi Keyt Smitning xabar berishicha, ushbu harakatlar har ikki basketbolchini klubning NBA G-ligasidagi farm jamoasi bo‘lgan "Motor City Cruise" tarkibiga jalb qilish uchun maxsus rejalashtirilgan.

Douson Garsiya o‘tgan yili Minnesota universitetini tamomlagach draftga kiritilmagan va so'ngra "Pistons" tizimiga qo‘shilgandi. U o‘tgan mavsum "Motor City Cruise" safida 17 ta o'yinda maydonga tushib, har bir bahsda o‘rtacha 6.3 ochko, 3.4 ta ribaund va 1.1 ta assist qayd etgan. Shuningdek, Garsiya o‘zining besh yillik talabalik faoliyati davomida Markett va Shimoliy Karolina universitetlari sharafini ham himoya qilgan.

Bashir Jixad esa uch mavsum Ball Steyt jamoasida o'ynagach, Arizona Steytga o‘tgan edi. 2025-yilgi draftda tanlanmagan Jixad o'tgan mavsumda Atlanta jamoasining G-ligadagi filiali "College Park Skyhawks" safida 48 ta uchrashuvda qatnashib, o‘rtacha 11.1 ochko, 5.6 ta ribaund va 1.2 ta assist to‘plagan. Bo‘yi 2 metr 6 santimetr bo‘lgan bu hujumchi iyul oyida "Pistons"ning Yozgi ligasidagi to'rtta o'yinida ham maydonga tushgandi.

O‘tgan hafta "Motor City Cruise" jamoasi "Skyhawks"dan Jixadning qaytish huquqlarini qo‘lga kiritgandi. Endilikda ushbu basketbolchilar imzolagan Exhibit 10 shartnomalari shartlariga ko'ra, agar ular "Motor City Cruise" safida kamida 60 kun davomida to‘p surishsa, o‘zlarining asosiy G-liga maoshlaridan tashqari 91 ming dollargacha bo'lgan bonus mukofotlarini olish imkoniyatiga ega bo'ladilar.