🏀 “Nyu-York Niks” tarkibni kuchaytirmoqda

“Nyu-York Niks” klubi yangi mavsum oldidan o‘z tarkibini shakllantirish ishlarini davom ettirmoqda. Xususan, jamoa erkin agent statusidagi markaziy o‘yinchi Dryu Yubanks bilan bir yillik kafolatlanmagan bitim tuzdi. Shuningdek, klub matbuot xizmatining xabar berishicha, yana bir baland bo‘yli basketbolchi Liam Robbinsga “Exhibit 10” shartnomasi taklif etilgan.

Transferlar doirasida “Nyu-York Niks” yana olti nafar sportchi — Jaden Akins, Nik Jurden, Mitch Maskari, Tobi Okani, Igor Milichich va Pol Zilinskas bilan shartnoma imzoladi va ko‘p o‘tmay ularni qo‘yib yubordi. Ma’lumotlarga ko‘ra, seshanba kuni klub qanot hujumchisi Jon Konchar bilan ham kelishuvga erishgan. Natijada, Yubanks va Konchar jamoaning asosiy tarkibidagi 14-o‘rin uchun raqobatlashishi mumkin, garchi Konchar boshqa jamoalarning ham qiziqishiga sabab bo‘lgan bo‘lsa-da.

Tajribali markaziy o‘yinchi Dryu Yubanks faoliyati davomida NBAda sakkiz mavsum o‘tkazib, San-Antonio, Portlend, Feniks, Yuta, Klippers va Sakramento kabi jamoalarda to‘p surgan. O‘tgan mavsumni Sakramentoda o‘tkazgan 29 yoshli basketbolchi jarohatlar sababli bor-yo‘g‘i 42 ta uchrashuvda qatnashib, o‘rtacha 5 ochko va 3 ribaund qayd etgan. U dekabr va mart oylarida chap qo‘l bosh barmog‘idan jarohat olib, mavsumni muddatidan oldin yakunlagandi.

Liam Robbins esa o‘tgan mavsumni “Portland Trail Blazers”ning G-Liga jamoasi safida o‘tkazib, har bir o‘yinda o‘rtacha 8.5 ochko to‘plagan. U iyul oyida “Niks”ning yozgi liga jamoasida ham maydonga tushgandi va hozirda ikki tomonlama shartnoma uchun asosiy nomzodlardan biri hisoblanadi. Olti nafar imzolanib ozod etilgan o‘yinchilar esa G-Liganing “Vestchester Niks” jamoasida kamida 60 kun o‘tkazishsa, asosiy maoshlariga qo‘shimcha ravishda 91 ming dollargacha bonus olish imkoniyatiga ega bo‘ladilar.