⚽️ PSJ rahbariyati Neymar uchun 20 mln yevro to‘lagan

Kataloniyaning Barselona klubi prezidenti lavozimiga qaytgan Joan Laporta o‘z vaqtida jamoani tark etgan braziliyalik hujumchi Neymar bilan bog‘liq transferni amalga oshirishga urinib ko‘rgan edi. Ispaniyaning Sport nashri RAC1 ma'lumotlariga tayanib tarqatgan xabarga ko‘ra, Laporta Parij shahriga maxsus ikki nafar vakilini yo‘llab, futbolchi bilan muzokaralar o‘tkazishni rejalashtirgan. O‘sha paytda Neymar ham Kataloniyaga qaytishga hamda o‘zining sobiq jamoadoshi Lionel Messi bilan bir jamoada to‘p surishni davom ettirishga ijobiy munosabatda bo‘lgan.

Kutilmagan urinishlar vaqtida Parij klubining rahbariyatidan biri Barselona amalga oshirayotgan harakatlardan xabar topgan. Vaziyatni o‘z nazoratiga olish va transferning oldini olish maqsadida ushbu shaxs futbolchining otasiga shaxsan 20 million yevro miqdorida mablag‘ o‘tkazib bergan. Ta'kidlanishicha, ushbu pul mablag‘lari Fransiya klubining rasmiy hisobvaraqlari orqali yuborilmagan.

Mazkur moliyaviy harakatdan so‘ng vaziyat tubdan o‘zgarib ketdi va transfer bitimi yakuniga yetmay barbod bo‘ldi. PSJ klubi oxir-oqibat braziliyalik yulduzni Parijda qolishga va amaldagi shartnomasini uzaytirishga ko‘ndirishga muvaffaq bo‘ldi.

Shunga qaramay, Neymar va Lionel Messining bir jamoada o‘ynash borasidagi istagi keyinchalik amalga oshdi. Faqatgina bu safar braziliyalik futbolchining Ispaniyaga qaytishi emas, balki argentinalik hujumchining Parij klubiga ko‘chib o‘tishi orqali ularning ikkalasi PSJ safida jamoadoshga aylanishdi.