Eron G‘arb sanksiyalarini keskin qoraladi 🇮🇷

Eron Tashqi ishlar vazirligi AQSh, Buyuk Britaniya va Yevropa Ittifoqining mamlakatga qarshi yangi sanksiyalar kiritish haqidagi qarorini keskin qoralab chiqdi. "Mehr" agentligi tarqatgan ma'lumotlarga ko‘ra, juma kuni G‘arb davlatlari o‘tgan yilgi namoyishlar va tartibsizliklarni bostirishda yoki ularni noto‘g‘ri yoritishda ayblab, o‘nlab eronlik shaxslar va tashkilotlarga nisbatan cheklov choralarini joriy qilgandi.

Tashqi ishlar vazirligi rasmiy vakili Nosir Kananiy ushbu sanksiyalarni konstruktiv bo‘lmagan xatti-harakat deb atab, ular G‘arb mamlakatining o‘z manfaatlariga ham mos kelmasligini ta'kidladi. Uning fikricha, G‘arb davlatlari Eron xalqining buyuk madaniyatini, respublika suverenitetini hamda o‘zaro xavfsizlik manfaatlarini hurmat qilishga asoslangan yangi siyosat yuritishi shart.

Eron hududida o‘tgan yilning sentabr oyida boshlangan tartibsizliklar Mahsa Aminining fojiali vafotidan so‘ng avj olib ketgandi. Politsiya bo‘limida hushini yo‘qotgan qiz bir necha kundan keyin Tehron shifoxonasida vafot etgan edi. Rasmiy tergov uning o‘limiga kasallik sabab bo‘lganini tasdiqlagan va politsiya tomonidan kaltaklangani haqidagi da'volarni rad etgan. Eron tomoni 2022-yilgi namoyishlar tashqi kuchlar tomonidan ushbu fojiali vaziyatdan foydalangan holda uyushtirilganini ta'kidlab keladi.

Kananiy mamlakatda jamoat xavfsizligini ta'minlash masalasiga to‘xtalib, Eron xalqi va hokimiyati G‘arbning g‘arazli tashviqotlari hamda bosimlariga sira taslim bo‘lmasligini bildirdi. Shu bilan birga, u G‘arb davlatlarining o‘z fuqarolari, xususan ayollar, ozchiliklar, rangli tanlilar, tub aholi va migrantlarga nisbatan og‘ir zo‘ravonliklar sodir etib kelayotganiga ishora qilib, ularning inson huquqlari borasidagi ko‘rsatkichlari juda yomon ekanini eslatib o‘tdi.