Tyson Fury Joshua bilan jang barbod bo'lganini aytdi 🥊

Og'ir vazn toifasidagi mashhur bokschi Tyson Fury vatandoshi Entoni Joshua bilan noyabr oyida bo'lishi rejalashtirilgan jang barbod bo'lishi mumkinligini malum qildi. U ijtimoiy tarmoqdagi sahifasi orqali Joshua ushbu to'qnashuvdan qochayotganini aytib, endi o'ziga yangi raqib qidirishga kirishganini bildirdi.

Avvalroq Fury (36-2-1, 25 nokaut) va Joshua (30-4, 27 nokaut) Saudiya Arabistonining Sela promouterlik kompaniyasi bilan 20-noyabr kuni Buyuk Britaniyada o'tkazilishi kutilgan jang uchun alohida shartnomalar imzolagani xabar qilingan edi. Biroq BBC Sport malumotiga ko'ra, tashkilotchilar, jumladan Sela va Netflix ushbu jangni Nyu-York shahridagi Madison Square Garden arenasida o'tkazishni afzal ko'rmoqda. Shu bilan birga, Joshuaning promouteri Eddi Xern kelishuvga ko'ra bahs aynan Buyuk Britaniyada bo'lishi kerakligini ta'kidlagan.

Shu sababli yuzaga kelgan tushunmovchiliklar fonida Fury yakshanba oqshomida Instagram sahifasida murojaat yo'llab, Joshua jangdan bosh tortayotganini va o'ziga boshqa raqib izlayotganini malum qildi. Shuningdek, u o'tgan yili o'zini ikki bor mag'lub etgan ukrainalik Oleksandr Usykni (25-0, 16 nokaut) noyabr oyida revansh jangiga chaqirdi. Fury Usykka murojaat qilib, to'qnashuvni joriy yilda yana bir bor o'tkazishni taklif qildi va qaror endi uning o'ziga bog'liqligini aytdi.

Ma'lumot uchun, Entoni Joshua iyul oyida Kristian Prengani nokautga uchratgan edi. O'shandan bir kun oldin esa Tyson Fury Mariusz Vachni yettinchi raundda texnik nokaut bilan mag'lub etgandi. Hozircha bo'lajak janglarning taqdiri va rasmiy tafsilotlari oydinlashgani yo'q.