Xulian Alvares Madrid klublari haqidagi mish-mishlarga javob berdi 🇦🇷

Manchester Siti hujumchisi Xulian Alvares uning Real yoki Barselona klublariga transfer qilinishi mumkinligi haqida tarqalgan mish-mishlarga o'z munosabatini bildirdi. Universal argentinalik hujumchi hozirgi jamoasida o'zini juda baxtli his qilayotganini va yaqin vaqt ichida boshqa jamoaga o'tish niyati yo'qligini ma'lum qildi.

Taniqli jurnalist Fabrisio Romanoning so'zlariga ko'ra, futbolchi Manchester Sitida bir yildan sal ko'proq vaqt davomida erishilgan natijadan mamnunligini ta'kidlagan. Uning so'zlariga ko'ra, jamoaning asosiy maqsadi yana musobaqalarda qatnashish va barcha sovrinlarni qo'lga kiritish uchun kurashishdan iborat.

Alvares 2022-yilning iyul oyida River Pleytdan taxminan 22 million yevro evaziga sotib olingan edi. Shundan so'ng u bir muddat ijara asosida sobiq jamoasida to'p surib, keyin Manchesterga ko'chib o'tgan. Hozirda 23 yoshli hujumchi shaharliklar safida 75 ta uchrashuvda maydonga tushib, 27 ta gol urdi va 14 ta golli uzatmaga mualliflik qildi. Uning Manchester Siti bilan amaldagi shartnomasi 2028-yilning iyun oyigacha mo'ljallangan.

Eslatib o'tamiz, o'tgan yilning dekabr oyida Xulian Argentina terma jamoasi safida jahon chempioni unvonini qo'lga kiritgan edi. Shuningdek, avvalroq Manchester Siti yangi Messi deb ataluvchi iqtidorli argentinalik futbolchini transfer qilishni ko'rib chiqayotgani haqida xabarlar tarqalgan edi.