🏆 Konor MakGregor Maxachev va Oliveyra jangi haqida gapirdi

UFC tashkilotining ikki vazn toifasidagi sobiq chempioni Konor MakGregor yaqinlashib kelayotgan Islom Maxachev hamda Charlz Oliveyra o'rtasidagi jang haqida o'z fikrlari bilan o'rtoqlashdi. Mazkur to'qnashuvda engil vazn toifasidagi vakant chempionlik kamari o'z egasini topishi kerak.

Ijtimoiy tarmoqlardagi muxlislardan biri irlandiyalik yulduzdan bo'lajak bahsda kim g'alaba qozonishini taxmin qilishni so'radi. Unga javoban Konor qisqacha tarzda Oliveyra ustun kelishini yozib qoldirdi.

Braziliyalik jangchini favorit deb bilishiga qaramamay, Makgregor o'zining ushbu raqibni nokautga uchrata olishiga umuman shubha qilmasligini qo'shimcha qildi. U o'z bayonotida faoliyati davomida to'qnash kelgan barcha braziliyaliklarni nokaut qilganini va Charlzni ham shunday taqdir kutishini ta'kidlab o'tdi.

Shunga qaramasdan, sobiq ikki karra chempion o'zining navbatdagi jangini yengil vazn divisonida emas, balki yarim o'rta vaznda o'tkazish niyatida ekanini ma'lum qildi. U bu boradagi rejalari aniqligini yozib qoldirdi.

Ma'lumot uchun, Islom Maxachev va Charlz Oliveyra o'rtasidagi chempionlik jangi 22 oktyabr kuni BAAning Abu-Dabi shahrida tashkil etiladigan UFC 280 musobaqasining asosiy voqeasi maqomida o'tkaziladi.