O'q otish: Osiyo chempionatida yangi medallar 🎯

Qozog'istonning Chimkent shahrida o'q otish sporti bo'yicha davom etayotgan Osiyo chempionati terma jamoamiz uchun muvaffaqiyatli davom etmoqda. Musobaqaning navbatdagi kungi bahslari sportchilarimiz uchun yana 7 ta medalni taqdim etdi va umumiy muvaffaqiyatga munosib hissa qo'shdi.

Jumladan, Rio-2016 va Tokio-2020 Olimpiya o'yinlarida qatnashgan tajribali vakillarimiz Vadim Skorovarov hamda Muxtasar Tohirova pnevmatik miltiqdan o'tish bo'yicha mikst dasturida kumush medalga sazovor bo'lishdi.

Musobaqaning yoshlar toifasidagi bahslarida esa yanada quvonarli natija qayd etildi. Aleksandra Davidova hamda Oybek Asilovdan iborat tandem o'z yo'nalishida barcha raqiblarini ortda qoldirib, oltin medalga sazovor bo'ldi va ularning g'alabasi sharafiga yurtimiz madhiyasi yangradi.

Shuningdek, mazkur kunda boshqa yo'nalishlarda ham hamyurtlarimiz sovrinli o'rinlarni egallashdi. Xususan, pnevmatik to'pponchadan o'tishning jamoaviy dasturida Muhammad Kamolov, Umidbek Kamolbekov va Veniamin Nikitin kumush medalni qo'lga kiritdi.

Bundan tashqari, harakatdagi nishonga o'q otish yo'nalishida ayollar o'rtasidagi jamoaviy bahslar, shuningdek o'smirlar va yoshlar toifalarida kumush medallar qo'lga kiritildi. Erkaklar o'rtasidagi harakatdagi nishonga jamoaviy bahslar esa bronza medali bilan yakunlandi.

Shu tariqa, chempionat davomida qo'lga kiritilgan jami medallarimiz 3 ta oltin, 5 ta kumush va 3 tadan iborat bo'ldi. Bugungi kunda ham terma jamoamizning bir qator sportchilari turli yo'nalishlarda medallar uchun kurashni davom ettiradilar.