2023 yilda sanoat 6 foizga o'sdi 🏭

Makroiqtisodiy va hududiy tadqiqotlar instituti ekspertlari 2023-yil davomida erishilgan sanoat o'sishining asosiy omillarini o'rganib chiqdi. O'tgan yil yakunlariga ko'ra, mamlakatimizda sanoat mahsulotlari hajmi 6 foizga ko'payib, barcha muhim tarmoqlarda ijobiy o'sish sur'atlari ta'minlandi. Sanoatning o'sish jadalligi 2022-yilgi ko'rsatkichdan 0.8 foiz punktga yuqori bo'ldi. Shuningdek, YaIM tarkibida sanoatning ulushi 26.1 foizni tashkil etib, qo'shilgan qiymat bo'yicha xizmatlar sohasidan keyin ikkinchi o'rinni egalladi.

Tarkibiy o'zgarishlarning eng yaxshi dinamikasini qayd etgan qayta ishlash sanoati umumiy o'sishning asosiy harakatlantiruvchi kuchi bo'ldi. Ushbu tarmoqda mahsulot ishlab chiqarish hajmi 6.7 foizga oshib, butun sanoat bo'yicha o'rtacha ko'rsatkichdan 0.7 foiz punktga yuqori natija ko'rsatdi. Buning natijasida qayta ishlash sanoatining umumiy sanoat tuzilmasidagi ulushi 84.4 foizga yetdi va 1.2 foiz punktga kengaydi.

Tarmoqning jadal rivojlanishiga neftni qayta ishlash (27.1%), metallurgiya (6.4%) hamda qurilish materiallari (11.3%) sanoatidagi tezkor o'sish tendentsiyalari asos bo'ldi. Shu bilan birga, mashinasozlik (7.4%), to'qimachilik va tikuvchilik (7.2%), oziq-ovqat, ichimliklar va tamaki mahsulotlari (5.9%) ishlab chiqaruvchi tarmoqlar umumiy o'sishning yarmidan ko'pini (53.4%) ta'minladi. Iste'mol mahsulotlari ishlab chiqarish hajmi 7.3 foizga oshgani holda, raqobatbardosh import hajmining ortishi tufayli uning o'sish jadalligi biroz sekinlashgani kuzatildi.

Hududiy kesimda iste'mol tovarlarining eng katta ulushi Andijon viloyati (27.3%), Toshkent shahri (20.8%) hamda Toshkent viloyatiga (11.9%) to'g'ri keldi. Chet el investitsiyalari ishtirokidagi korxonalarning sanoatdagi hissasi Qoraqalpog'iston Respublikasida 51.1%, Samarqand viloyatida 42.3%, Toshkent shahrida 30.2% va Farg'ona viloyatida 25.4% ni tashkil etdi. Bundan tashqari, elektr energiyasi bilan ta'minlash tarmog'ida 9.7 foizlik ijobiy o'sish kuzatilgan bo'lsa, konchilik sanoatida bu ko'rsatkich 1 foizni tashkil etdi.