Red Bull tarkibida 2025-yilda o‘zgarishlar bo‘lishi mumkin 🏎

Red Bull rahbariyati joriy mavsum yakuniga qadar Red Bull Racing hamda RB jamoalarining tarkibida hech qanday o‘zgarish ro‘y bermasligini rasman tasdiqladi. Ushbu qarorga ko‘ra, barcha poygachilar o‘z o‘rinlarini saqlab qolishadi va jamoalar oldiga qo‘yilgan maqsadlar sari kurashni davom ettirishadi.

Shu bilan birga, jamoaning maslahatchisi Xelmut Marko kelajakdagi rejalar haqida gapirar ekan, Serexo Peresning 2025-yildagi kelajagi to‘liq kafolatlanmaganiga e'tibor qaratdi. Ma'lumki, tajribali meksikalik poygachining amaldagi shartnomasi 2026-yilning oxirigacha imzolangan bo‘lishiga qaramay, vaziyat o‘zgarishi mumkin.

Xelmut Markoning ta'kidlashicha, Serexo Peres jamoada qolishda davom etadi va mutasaddilar uning o‘zining avvalgi yuqori sport formasiga qaytishini istamoqda. Shuningdek, Daniel Rikardo ham o‘z o‘rnini saqlab qolgani bois, yaqin vaqt ichida jamoalar tarkibida o‘zgarishlar kuzatilmaydi.

Biroq, mavsum yakunlari va umumiy natijalardan kelib chiqib, kelasi yilda vaziyat keskin tus olishi mumkin. Xelmut Markoning so‘zlariga ko‘ra, 2025-yilda jamoalar tarkibidagi kartalar qaytadan aralashtirilishi, ya'ni ulkan o‘zgarishlar amalga oshirilishi ehtimoli istisno qilinmaydi.