«Barselona» Alvares uchun 100 mln yevro taklif qildi ⚽

Ispaniyaning «Barselona» klubi transfer bozorida keskin harakatga o'tdi va Madridning «Atletiko» jamoasi hujumchisi Xulian Alvaresni o'z safiga qo'shib olish uchun rasmiy taklif yubordi. Bu haqda taniqli sport jurnalisti va insayder Fabritsio Romano ma'lum qildi.

Kataloniyaliklar argentinalik futbolchi uchun to'g'ridan-to'g'ri 100 million yevro taklif qilishgan. Qayd etilishicha, mazkur moliyaviy taklifga hech qanday qo'shimcha bonuslar yoki bitimga boshqa o'yinchilarni qo'shish shartlari kiritilmagan. Ushbu vaziyat so'nggi bir sutka ichida madridliklar lagerida jiddiy noroziliklarga sabab bo'lgan.

Shu bilan birga, hujumchining o'zi ham «Atletiko» rahbariyatidan amaldagi shartnomasini bekor qilishni talab qilgani malum bo'ldi. Joriy mavsumda Xulian Alvares barcha musobaqalarda 49 ta uchrashuvda maydonga tushib, o'z hisobiga 20 ta gol va 9 ta golli uzatma yozdirib qo'ygan.

Eslatib o'tamiz, iqtidorli hujumchi AQSh, Meksika va Kanadada bo'lib o'tadigan 2026 yilgi jahon chempionati uchun Argentina terma jamoasining rasmiy qaydnomasiga ham kiritilgan.