🏎️ Ozarbayjon Gran-Prisi: Piastri g'olib!

Ozarbayjon poytaxti Boku shahrida o'tkazilgan Formula-1 chempionatining navbatdagi bosqichi nihoyatda murosasiz va kutilmagan voqealarga boy o'tdi. Musobaqa yakunlariga ko'ra, "Maklaren" jamoasining iste'dodli piloti Oskar Piastri barchani ortda qoldirib, shohsupaning eng yuqori pog'onasiga ko'tarilishga muvaffaq bo'ldi.

Ushbu shiddatli poygada asosiy da'vogarlardan biri bo'lgan "Ferrari" vakili Sharl Lekler g'olibdan 10,9 soniya ortda qolgan holda marraga ikkinchi bo'lib yetib keldi. Kuchli uchlikka esa "Mersedes" jamoasi haydovchisi Jorj Rassel yakun yasadi. Shuningdek, kuchli o'nlikdan Lando Norris, Maks Ferstappen, Fernando Alonso, Aleks Albon, Franko Kolapinto, Lyuis Xemilton hamda Oliver Bermen joy oldi.

Ta'kidlash joizki, atigi 23 yoshni qarshilagan Oskar Piastri uchun bu Formula-1 tarixidagi ikkinchi muvaffaqiyatdir. U bungacha Vengriya Gran-Prisida ham birinchi o'rinni qo'lga kiritgan edi.

Boku ko'chalarida kechgan bahsda ayrim taniqli poygachilar marraga yetib kela olmadi. Jumladan, Karlos Sayns, Serxio Peres, Lans Stroll va Yuki Cunoda poygani muddatidan oldin yakunlashga majbur bo'lishdi. Endi Formula-1 chempionati o'zining navbatdagi bosqichini o'tkazish uchun 20-22-sentyabr kunlari Singapurga ko'chib o'tadi.