Sudan: Ocharchilik deyarli har yerda 🌍

Jahon sog‘liqni saqlash tashkiloti bosh direktori Tedros Adhanom Gebreyesus BBC telekanalining Today dasturiga bergan intervyusida Sudan davlatidagi og‘ir gumanitar inqiroz haqida so‘zlab berdi. Unga ko‘ra, mamlakatda keskin ocharchilik holati deyarli barcha hududlarda kuzatilmoqda va umumiy vaziyat juda xavotirli tus olgan.

Sudanda aholining ommaviy ravishda boshqa hududlarga ko‘chishi kuzatilib, bu ko‘rsatkich hozirgi kunda dunyoda eng yirik ekani qayd etildi. Bosh direktorning so‘zlariga ko‘ra, mamlakatni tark etishga yoki ko‘chishga majbur bo‘lgan fuqarolar soni allaqachon 12 million nafarga yetgan. Shu bilan birga, xalqaro hamjamiyatning mazkur muammoga qaratayotgan e’tibori juda past darajada ekani va bunda irqiy omillar ham rol o‘ynayotgani ta’kidlandi.

Doktor Tedros yaqinda Sudandagi majburiy ko‘chirilgan shaxslar uchun tashkil etilgan maxsus lager hamda shifoxonaga tashrif buyurganini esladi. Uning ta’kidlashicha, urush girdobidagi mamlakatda vayronagarchiliklar, aholining ko‘chishi va keng tarqalgan kasalliklar fonida endilikda ocharchilik muammosi ham keskinlashgan.

JST rahbarining ma’lum qilishicha, hozirgi kunda Sudan aholisining qoq yarmiga, ya’ni 25 millionga yaqin insonga zudlik bilan insonparvarlik yordami zarur. Eslatib o‘tamiz, mamlakat armiyasi hamda Tezkor harakat kuchlari (RSF) o‘rtasida 2023-yilning aprel oyida boshlangan qонli fuqarolar urushi oqibatida minglab begunoh odamlar halok bo‘lgan edi.