🏎 Braun Red Bull va Daniel Rikardo harakatidan norozi

Singapur Gran-prinisining oxirgi soniyalarida poygachi Daniel Rikardo "Soft" turdagi shinalarga o'tib, eng tezkor davr muallifiga aylandi. Uning ushbu urinishdan asosiy maqsadi raqobatchi Lando Norrisni qo'shimcha ochkodan mahrum qilish edi. Biroq, bu holat McLaren Racing jamoasi rahbariyatining keskin e'tiroziga sabab bo'ldi.

McLaren ijrochi direktori Zak Braun RB jamoasi Red Bull Racing'ning yaqin hamkori ekanini eslatib, ushbu qarorning adolatliligiga shubha bildirdi. Uning fikricha, ortda borayotgan va o'zi uchun ochko olish imkoniyatiga ega bo'lmagan poygachining pit-stopga kirishi shubhali holat. Braun bu kabi holatlar qoidabuzarlik alomatlarini o'z ichiga olishi mumkinligidan xavotirda.

Taniqli mutaxassisning ta'kidlashicha, bunday holat "katta va kichik jamoalar" o'rtasidagi o'zaro yordam usullariga o'xshaydi. Braun bu birinchi marta sodir bo'layotgani yo'qligini va kelgusida ham takrorlanishi mumkinligini taxmin qilmoqda.

Shuningdek, u ushbu masala yuzasidan o'z savollarini o'rtaga tashlashini va vaziyatni chuqur o'rganishini bildirdi. Zak Braun hech qanday real ochko olib kelmagan bu harakat jamoalararo munosabatlarning yorqin namunasi ekanini qo'shimcha qildi.