Germaniya kemalari Tayvan bo'g'ozidan o'tdi 🚢

Germaniya harbiy-dengiz kuchlarining ikkita kemasi juma kuni Tayvan bo'g'ozidan o'tib ketdi. Bu so'nggi yigirma yil ichida nemis harbiy kemalarining mazkur bahsli suvlardan ilk bor o'tishi hisoblanadi va Berlinning Osiyo-Tinch okeani mintaqasida mudofaa aloqalarini kengaytirish harakatlari doirasida amalga oshirildi.

O'zini o'zi boshqaradigan demokratik orol bo'lgan Tayvanni o'z hududi deb da'vo qiladigan Xitoy bunday qadamlarni provokatsiya deb baholaydi. AQSh hamda uning Avstraliya, Kanada, Buyuk Britaniya va Fransiya kabi ittifoqchilari bo'g'ozning xalqaro suvlar ekanini ko'rsatish maqsadida u yerda muntazam ravishda navigatsiya erkinligi operatsiyalarini o'tkazib keladi.

Germaniya 2021-2022 yillardagi so'nggi dengiz safarida Pekin bilan ziddiyatdan qochishga urinib, Tayvan bo'g'ozidan o'tmagan edi. Biroq bu yondashuv mamlakat ichida keskin tanqid qilinganidan so'ng, joriy safarda rahbarlar Janubiy Koreyadan Filippinga yo'l olgan kemalarni mazkur bo'g'oz orqali o'tkazishga qaror qilishdi.

Germaniya mudofaa vaziri Boris Pistorius Berlinda jurnalistlarga bergan intervyusida xalqaro suvlar doimo xalqaro suvlar bo'lib qolishini ta'kidladi. Tayvan Mudofaa vazirligi "Baden-Wuerttemberg" frigati va "Frankfurt am Main" ta'minot kemasi bo'g'ozdan shimoldan janubga o'tganini tasdiqlab, safar davomida vaziyat odatdagidek saqlanib qolganini bildirdi.

Xitoy TIV vakili Mao Nin Pekin uchun Tayvan masalasi navigatsiya erkinligi emas, balki suverenitet va hududiy yaxlitlik masalasi ekanini aytdi. U Xitoy barcha davlatlarning navigatsiya huquqini hurmat qilishini, biroq suverenitet va xavfsizlikka tahdid soluvchi harakatlarga qat'iy qarshi turishini qo'shimcha qildi.