Рафаэль Бенитес "Наполи"га қайтиши мумкин ⚽

Italiyaning mashhur "Napoli" klubida bosh murabbiy o‘zgarishi kutilmoqda. Ma’lum bo‘lishicha, jamoani 60 yoshli taniqli mutaxassis Rafael Benites boshqarib borishi mumkin. U bu lavozimda amaldagi ustozi Jennaro Gattuzoning o‘rnini egallashi kutilmoqda.

Manbalarning xabar berishicha, hozirda har ikki tomon hamkorlik masalasida o‘zaro kelishuvga erishib ulgurgan. Agar barcha kelishuvlar rasmiylashsa, ispaniyalik murabbiy uchun bu Neapol klubidagi ikkinchi davr bo‘ladi.

Eslatib o‘tamiz, Rafael Benites bundan avval, aniqrog‘i 2013–2015-yillarda ham "Napoli" jamoasiga ustozlik qilgan edi. Uning so‘nggi ish joyi Xitoyning "Dalyan Ifan" klubi bo‘lgan bo‘lib, murabbiy o‘sha yerda faoliyat olib borganidan xabaringiz bor.

Hozirgi kunda neapolliklar Italiya chempionatida barqaror harakat qilmoqda. Jamoa ichki birinchilikda 19 ta uchrashuv o‘tkazib, o‘z hisobiga 37 ochko yozdirib qo‘ygan va ayni paytda turnir jadvalining 6-pog‘onasidan joy olgan.